Ц.БААСАНДОРЖ: АТГ-ЫН АХЛАХ КОМИССАРУУД ТАЛИЙГААЧИЙГ ДАРАМТАЛСАН ЗҮЙЛ БАЙГАА

ШШГЕГ-ын харьяа Цагдан хорих 461-р ангид амиа алдсан гавьяат хуульч Л.Бямбаа агсны өмгөөлөгч Ц.Баасандорж мэдээлэл хийлээ.

Тэрээр хэлэхдээ "2019 оны хоёрдугаар сарын 23-ны өдөр талийгаач Л.Бямбаа амь насаа алдсан харамсалтай хэрэг гарсан. Энэ хэрэг дээр АТГ болон Шүүхийн шийдвэр гүйцэтгэх байгууллага албан тушаалаа урвуулан ашиглаж, хуульд заасан хугацаанаас илүү хугацаагаар талийгаачийг цагдан хорьж, амь насыг нь хохироосон. Эрүүгийн хэрэг хянан шийдвэрлэх тухай хуулийн 31.5.3-т "хойшлуулшгүйгээр баривчилсан тохиолдолд 24 цагийн дотор шүүхэд мэдэгдэж, зөвшөөрөл авна" гэж заасан байдаг. Гэтэл талийгаачийг шүүхийн зөвшөөрөлгүй баривчилсан хэрнээ шүүхэд 24 цагийн дотор шүүхэд мэдэгдээгүй. Улмаар үргэлжлүүлэн 40 гаруй цаг хорьсон. Шүүхийн захирамжаар хүнийг 48 цаг хүртэл саатуулдаг. Тэгэхээр талийгаачийг 48 цагийн дараа суллах ёстой байсан. АТГ-аас талийгаачийг яллагдагчаар татаад цагдан хорих саналыг шүүхэд хүргүүлэхэд ажлын цаг дууссан гэдэг шалтгаанаар хүлээж аваагүй байдаг. Шүүх зөвшөөрөл өгөөгүй тохиолдолд хувийн баталгаа гаргуулж, суллах ёстой. Гэтэл хууль бусаар үргэлжлүүлэн цагдан хорьсон 20 орчим цагийн дараа талийгаач амь насаа алдсан байдаг. Тиймээс АТГ хуулинд заасан хугацаанаас илүү хугацаагаар, шүүхийн шийдвэргүйгээр цагдан хорьсон.

Авлигатай тэмцэх газар талийгаачийг хоёрдугаар сарын 22-нд бүтэн өдөржингөө ганцааранг нь эрүүдэн суулгасан байгаа юм. Ингэхдээ тус газрын ахлах комиссарууд өрөөнд нь орж, хүүтэй нь холбогдуулан дарамталсан зүйл байгаа. Тухайн үед талийгаач хэнтэй уулзсан, ямар дарамтад байсан талаарх мэдээллийг олгоогүй байна. Монгол Улсын төрийн байгууллага нийлж байгаад талийгаачийн амь насыг хохироосон. АТГ-ын удирдлагууд уучлалт гуйж, холбогдох хүмүүс нь ажлаасаа чөлөөлөгдөхөөс гадна эрүүгийн хэрэг үүсгэж шалгуулах ёстой. Өнөөдөр АТГ-ыг шалгадаг байгууллага алга. Тийм учраас цагдаагийн байгууллага, АТГ хэргийг шалгана гэхэд эргэлзэж байгаа. Хэргийг өөр харьяалалд шилжүүлэх тухай яригдаж байна. АТГ-аас хэрэг эцэслэн шийдэгдээгүй байхад талийгаачийг авлига өгсөн нөхцөл байдал тогтоогдсон учраас хэрэг үүсгэсэн гэсэн мэдээллийг нийгэмд тараасан. Гэтэл Үндсэн хуульд гэм буруутай нь тогтоогдоогүй байхад буруутайд тооцохыг хориглодог. Ер нь АТГ-аас гаргасан мэдээлэлд итгэхгүй байгаа. Яагаад гэвэл АТГ маш олон ажиллагааг хууль бусаар явуулдаг. Маш олон хүнийг тагнаж, чагнадаг. Сүрдүүлж, шантаачилдаг байгууллага болж хувирсан. Тийм учраас энэ байгууллагаас гаргаж байгаа мэдээлэл эргэлзээтэй " гэж ярилаа.

itoim.mn