ЭЭЛЖИТ БУС ЧУУЛГАН ХУРАЛДАХ УУ?

Энэ долоо хоногийн пүрэв, баасан гаригийн аль нэгэнд нь УИХ-ын даргын дэргэдэх зөвлөл хуралдаж ээлжит бус чуулганыг хуралдуулах эсэхийг тодорхой болгохоор болсон байна. Гэсэн ч уг хурлаар чуулганыг хуралдуулах шаардлагагүй гэх шийдвэр гарна гэсэн таамгийг албаныхан өгч байна.

Учир нь УИХ-ын ээлжит бус чуулганаар маш тодорхой, гарах шийдвэр нь бэлэн болсон асуудлыг хэлэлцдэг дэгтэй. Нөгөөтэйгүүр ээлжит бус чуулганы 14 хоногийн хугацаанд 2-3 тодорхой асуудлыг л хэлэлцэж амжина. Энэхүү 2-3 асуудал нь чухам юу байх вэ гэдэг нь анхаарал татаж байна. Энэ цөөн асуудлын нэг нь Татварын багц хуульд нэмэлт, өөрчлөлт оруулах хуулийн төсөл байх нь тодорхой байгаа юм. Гэтэл Татварын багц хуулийн төсөлд нэмэлт, өөрчлөлт оруулах төслийг 14 хоногт багтаан шийдвэрлэх боломжгүй. Учир нь тус хууль бэлтгэл ажил ихтэй, олон нийтээс санал авах шаардлагатай том хууль. Хуулийн төслийг батлахад шаардлагатай бэлтгэл ажлуудыг хийж амжаагүй байгаа учраас 14 хоног багадна гэж буй.

Татварын багц хуульд нэмэлт, өөрчлөлт оруулахаас өөр нэн даруй хэлэлцэх шаардлагатай хуулийн төсөл байхгүй учраас ээлжит бус чуулганы хуралдааныг зарлахгүй байх магадлал өндөр байгаа гэж таамаглаж байгаа юм. Хэрвээ ээлжит бус чуулганы хуралдаан зарлавал Оюутолгойн гэрээний хэрэгжилтэд хийсэн шалгалт, Тавантолгойг шалгах ажлын хэсгийн дүгнэлтийг сонсоод завсарлаж ч магадгүй гэх мэдээллийг мөн эх сурвалж өглөө