ХӨГЖЛИЙН БАНКНААС ЗЭЭЛ АВСАН АЖ АХУЙ НЭГЖҮҮДИЙН ЖАГСААЛТ

АН эрх барьж байх үед "Чингис", "Самурай" бондын мөнгөөр төсөл, хөтөлбөрүүдийг санхүүжүүлэх эрх бүхий банк нь Хөгжлийн банк байв. Одоо ч энэ эрх нь хэвээрээ. Тухайн үед МАН-ынхан Хөгжлийн банкны удирдлагуудын тансаглал, үрэлгэн зардлыг баримттайгаар илчилж, тус банкны экс удирдлагууд тэдгээрийг нь үгүйсгэж байсан удаатай. Гэвч Хөгжлийн банкны өмнөх удирдлагууд 29 хүнийг 2.6 тэрбумаар урамшуулж, программ хангамжийн нийлүүлэлтэд тэрбум гаруй төгрөг зарцуулсан баримтыг зарим эх сурвалж энэ долоо хоногт ил болгосон. Тус банкны захирал асан Н.Мөнхбатыг өдгөө хуулийнхан саатуулан шалгаж байгаа бол МАН, АН-ынхан "Манайхан, танайхан их зээл авсан" гэх мэтээр улстөржицгөөсөн хэвээр байна. УИХ-ын гишүүн Л.Энх-Амгалан өчигдөр энэ талаар мэдээлэл хийж, бүрэн эрхээсээ татгалзаж шалгуулахад бэлэн гэдгээ мэдэгдсэн. Харин Хууль зүй, дотоод хэргийн дэд сайд Б.Энхбаяр өчигдөр орой "Хөгжлийн банкнаас тэр, энэ нам, компани зээл авсан, чи их, бага идсэн" гэх эзэнгүй улстөржилтөд цэг тавина. Зээл авсан бүх жагсаалтыг ил тавина" хэмээн твиттер хуудастаа бичсэнийхээ дараахан Хөгжлийн банкнаас зээл авсан компаниуд, улсын төсвөөс эргэн төлөгдөх нөхцөлтэйгөөр санхүүжүүлж буй төсөл, арга хэмжээнүүдийн жагсаалтыг ил болголоо. УИХ өнгөрсөн мягмар гарагт Засгийн газраас Хөгжлийн банкнаас шалгалт хийхээр томилогдсон ажлын хэсгийнхний мэдээллийг сонсох байсан ч АН-ынхны эсэргүүцэлтэй тулгарч тав хоногоор хойшлуулсан юм. Хөгжлийн банкнаас зээл авсан аж ахуйн нэгжүүд болон бусад мэдээллүүдийг доорх хүснэгтүүдээс харна уу.