ЕРӨНХИЙЛӨГЧ Х.БАТТУЛГА ТӨСӨВТ ХОРИГ ТАВИХАА МЭДЭГДЛЭЭ

Ерөнхийлөгч Х.Баттулга өнөөдөр УИХ-ын чуулганы нэгдсэн хуралдаанд оролцож 2019 оны төсвийн төслийн талаар саналаа хэлж байна. Тэрбээр энэ үеэр Монгол Улсын 2019 оны Төсвийн төслийг энэ хэвээр баталбал төсөвт хориг тавих болно гэлээ. Тэрбээр "2019 оны төсвийн төсөл ихээхэн шүүмжлэл хүлээхээр муу боловсруулсан байна. Төсөв боловсруулсан хүмүүс нь илт ашиг сонирхлын зөрчилтэй байгаа нь харагдаж байна. Тухайлбал, Сангийн сайд өөрийнхөө тойрогт ихээхэн хэмжээний төсөв суулгасан байна. Эдийн засгийн үзүүлэлтээ тогтож харвал сайжирсан зүйл огт байхгүй. Инфляци 8.8 хувь болж өсжээ. Төгрөгийн ам.доллартай харьцах ханш 602 төгрөгөөр сулраад байна. Бензиний үнэ 19-30 хувь өсчихөөд байхад Засгийн газар хариу үйлдэл үзүүлэх чадваргүй сууж байна. Сүүлийн хоёр жилд улсын нийт өр нэмэгдсэн байна. Одоо 21.1 их наяд төгрөгийн өртэй байна. Өр нэмж авахгүй, зээл авахгүй гэж байсан эрх баригчид өрийг нэмэгдүүлсэн байж өр дарлаа гэж ярьж байгааг би ойлгохгүй байна. Дээр нь дэлхийн эдийн засаг том хямралтай нүүр тулж магадгүй байна. Засгийн газрын төсвийг алдагдалтай төлөвлөсөөр өр их хэмжээгээр нэмэгдлээ. Алдагдал бол өр юм. Төв банкны үнэт цаасны өрийн үлдэгдэл ихэслээ. Өнөөдөр төв банк 4 их наяд 276 тэрбум төгрөгийн өртэй байгаагаас дотоод өр ямар их байгааг харж болно" гэлээ. Тэрбээр мөн "Авлигатай тэмцэх газрын урсгал зардалд 12 тэрбум төгрөг төсөвлөжээ. Энэ байгууллага оФФшор дахь хөрөнгийг оруулж ирэх, үндэслэлгүйгээр баяжсан хүмүүстэй тэмцэхийн оронд сургуулийн захирлуудтай тэмцээд эхэллээ. Ажлаа хийдэггүй энэ байгууллагыг санхүүжүүлэх хэрэг байна уу. 2019 оны төсвийг ахин нягталж харахыг хүсье. Ирэх жилийн төсөвт үндэсний эрх ашгийг хангасан, шинэчлэл хийсэн төсөв хийхийг хүсье. Хэрэв 2019 оны төсвийг энэ байдлаар нь баталбал нийт ард түмнээс сонгогдсон төрийн тэргүүний хувьд уг төсөвт хориг тавих болно. Өнөө орой 18:00 цагаас 2019 оны төсвийн талаар Үндэсний аюулгүй байдлын хурлыг зарлаж байна" гэлээ.Одоо УИХ-ын чуулганаар Дэлхийн худалдааны байгууллагын "Иргэний агаарын хөлгийн худалдааны хэлэлцээр"-т Монгол Улс нэгдэн орох тухай хуулийн төслийг соёрхон батлахаар хэлэлцэж эхлэв