З.БАЯНСЭЛЭНГЭ 19 САЯ ТӨГРӨГИЙГ ТӨЛӨХГҮЙ ГЭВ

УИХ-ын гишүүн асан, Барилга хот байгуулалтын сайдаар ажиллаж байсан З.Баянсэлэнгийг албан тушаалын байдлаа ашигласан хэргээр удаан шалгаж, улмаар Сонгинохайрхан дүүргийн анхан шатны шүүх түүний гэм буруутай эсэхийг хэлэлцэж шүүсэн.Түүнийг 2016 онд "Бэрэн" группийн орон сууцнаас 123 орон сууцыг тендэр зарлалгүйгээр худалдан авсан нь улсын төсөвт 972 сая төгрөгийн хохирол, хүнд хор уршиг учруулсан гэдэг.

Анхан шатны шүүхээс гарсан шийдвэр нь шүүгдэгч З.Баянсэлэнгийг албаны эрх мэдэл албан тушаалын байдлаа урвуулан ашигласны улмаас улсын төсөвт 972,448,955 төгрөгийн хохирол, хүнд хор уршиг учруулсан гэмт хэрэг үйлдсэн гэмт буруутайд тооцож, 2002 оны Эрүүгийн хуулийн ерөнхий ангийн 11 дүгээр зүйлийн 11.1, 12 дугаар зүйлийн 12.1, 36 дугаар зүйлийн 36.2 дахь хэсэгт заасныг журамлан тусгай ангийн 263 дугаар зүйлийн 263. 2 дахь хэсэгт зааснаар төрийн байгууллагад ажиллах эрхийг 3 жилийн хугацаагаар хасч, хөдөлмөрийн хөлсний доод хэмжээг 100 дахин нэмэгдүүлсэнтэй тэнцэх хэмжээний буюу 19,200,000 төгрөгөөр торгох ялаар шийтгэсэн юм.Харин 972 сая төгрөгийг "Бэрэн" группээс гаргуулж улсын орлогод оруулахаар шийдвэрлэсэн юм.Тэгвэл гишүүн асан З.Баянсэлэнгэ анхан шатын шүүхийн шийдвэрийг хүлээн зөвшөөрөхгүй байгаагаа илэрхийлжээ.

Тэрбээр "Би 19 сая төгрөг төлөхгүй. Анхан шатны шүүхээс гарсан шийдвэр учир эцсийнх биш. Анхан шатны шүүх эхийг нь эцээж тугалыг нь тураахгүй л гэж намайг хорихгүйгээр торгууль оногдуулсан нь миний талд ашигтай болсон мэт өнөөдөр хүмүүсийн амны "бай" болж байх шиг байна. Би хоригдохоос айхгүй. Шударга бус зүйлийн төлөө би айхгүй байна" гэжээ