Л.ОЮУН-ЭРДЭНЭ: М.ЭНХБОЛД НАМЫНХАА НЭР ХҮНДИЙГ СЭВТЭЭСЭНДЭЭ УУЧЛАЛ ГУЙСАН

УИХ-ын гишүүн Л.Оюун-Эрдэнэ өнөөдөр "60 тэрбум"-ын асуудлаар сэтгүүлчдэд мэдээлэл өглөө. Тэрээр мэдээллийн эхэнд "УИХ-ын даргад энэ сарын 20-ны өдөрт багтаан "60 тэрбум"-ын асуудалд нэр холбогдсондоо харамсаж буйгаа илэрхийлж, уучлал гуйх, энэ хэргийг дахин шалгаж эхлэх, ээлжит бус чуулган зарлах, АТГ-ын удирдлагад хариуцлага тооцох зэрэг шаардлага тавьсан. Өчигдөр 18:00 цагт шаардлагын хариугаа бичгээр авчээ.

Тус бичигт "Миний бие МАН-ын даргаар ажиллаж байхдаа хэн нэгнийг албан тушаалд мөнгөөр томилсон үйлдэл гаргаагүй болно. Гэвч өнөөдрийг хүртэл "60 тэрбум"-ын гэх асуудалтай нэр холбогдож, намынхаа нэр хүндийг унагасандаа туйлын их харамсаж байна" гэж дурдсан байна.

Мөн Нийслэлийн Ерөнхий Прокурорын газраас "60 тэрбум"-ын гэх хэргийг хаасан байсныг дахин сэргээж байгаагаа бичгээр мэдэгдсэн. Тагнуулын Ерөнхий Газраас хэрэг бүртгэлтэй холбоотой шинэ мэдээллүүд гарсан учраас асуудлыг дахин нягталж үзэхээр болсон юм байна" гэж онцоллоо.Мөн тэрээр "МАН-ын Хяналтын ерөнхий хорооноос энэ улиралдаа багтааж М.Энхболд, Ц.Сандуй нарт хариуцлага тооцох асуудлыг намын Удирдах зөвлөлөөр оруулах шийдвэр гаргасан. Мөн энэ долоо хоногтоо багтаж УИХ-ын Хууль зүйн байнгын хороог хуралдуулж, ээлжит бус чуулган зарлах ёстой чиглэл өгсөн. Ер нь сүүлийн 20 жилийн хугацаанд төрийн гурван өндөрлөгөөс уучлал хүссэн мэдэгдэл гаргасан анхны тохиолдол юм. Олон нийтийг ихээр хохироосон мөртлөө эзэн нь хариуцлага хүлээдэггүй асуудал газар авлаа. Ийм байдлыг ордны дотроос засч чадахгүй бол Төрийн ордны гаднаас засах нийтийн сэтгэл зүй бэлэн болсон гэдгийг хэлмээр байна. Зуны гурван сарын хугацаанд нэг УИХ-ын гишүүн олон нийтийн дэмжлэгтэйгээр ийм үр дүнд хүрч чадлаа. Цаашид ийм байдлаар ажиллахад хаачихсан байсан хэргүүдийг сэргээн хянах, зарим асуудлыг эргэж харах боломж бүрдэнэ гэдгийг харуулж чадлаа" гэсэн юм.