ХУВИЙН ТААРАМЖГҮЙ ХАРИЛЦААНААС БОЛЖ, НЭГНИЙГЭЭ ХӨНӨӨСӨН ГЭВ

Зам тээврийн хөгжлийн яамны байр буюу Засгийн газрын 13 дугаар байранд өчигдөр/08.09/ онц ноцтой хүн амины хэрэг гарсан талаар бид мэдээлсэн. Уг хэргийн талаар өнөөдөр цагдаагийн байгууллагаас мэдээлэл хийлээ.Цагдаагийн ерөнхий газрын хэвлэлийн төлөөлөгч, мэргэжилтэн М.Мөнхшүр "Өчигдөр буюу наймдугаар сарын 9-ний орой 22:00 цагийн үед Сүхбаатар дүүргийн нэгдүгээр хороонд байрлалтай Зам, Тээврийн хөгжлийн яамны байрны гадаа хүн нас барлаа гэсэн дуудлага ирсэн. Үүний дагуу тус дүүргийн Цагдаагийн нэгдүгээр хэлтсийн жижүүрийн бүлэг үзлэг шалгалтыг хийж, ажиллалаа.

Урьдчилсан байдлаар ЗТХЯ-ны Хяналт шинжилгээ үнэлгээ, Дотоод аудитын газрын дарга Г-гийн амь насанд Төрийн тусгай удирдлагын газрын дарга М халдсан болохыг тогтоогоод байна. Уг хэрэгт эрүүгийн хуулийн тусгай ангийн 10.1-т зааснаар хэрэг бүртгэлт нээсэн. Талийгаач Г-н үхлийн шалтгааныг Шүүх эмнэлгийн шинжилгээний дүнгээр эцэслэн тогтоох боломжтой" гэлээ.Мөн тэрбээр "Цахим орчинд албан тушаалаа булаацалдаж маргалдсан гэх ташаа мэдээлэл гарсан. Үүнд ямар нэгэн албан тушаалын маргаан байхгүй. Хувийн таарамжгүй харилцаанаас болж ийм асуудал болсон. Г, М нар архидан согтуурсан байсан эсэхийг мэдүүлэг болон хэргийн ажиллагааны явцад тогтооно" гэв