МАН ДОТОРХ ЗОДООН ГАЗРЫН ДАРГЫНХАА АМИНД ХҮРЧЭЭ

Зам тээврийн хөгжлийн сайд Ж.Бат-Эрдэнэ өчигдөр орой буюу 18 цагт яамныхаа газрын дарга нарыг дуудаж үүрэг даалгавар өгчээ. Үүний дараагаар тус яамны дөрвөн газрын дарга ажлынхаа өрөөнд архидан согтуурсан байна. Энэ архидалтанд "би байгаагүй ээ" гэж салбарын сайд нь түргэхэн гэгч нь ярилцлага өгчээ. Эх сурвалжийн хэлж буйгаар ажлынхаа өрөөнд гурван цаг орчим архи уусан газрын дарга нар нэлээн согтуу яамнаасаа гарч явж байхтай амиа алдсан тус яамны Хяналт, шалгалт үнэлгээ, дотоод аудитын газрын дарга Г таарчээ. Талийгаач Г нь яамныхаа байран дээр бусад дарга нартайгаа цуг архи уугаагүй тухай эх сурвалжууд мэдээлсэн юм. "Зам тээврийн хөгжлийн яам"-ны гаднах талбайд М, Г нар барилцан авч М нь Г-г зодож байгаа бичлэг "Авто тээврийн үндэсний төв"-ийн камерт үлдсэн байна. Г-ийн амь насанд хүрсэн гэх М нь 2008-2012 онд Ерөнхийлөгч Х.Баттулгыг сайд байхад газрын даргаар ажиллаж байжээ. 2012 оноос хойш ажилгүй байсан түүнийг У.Хүрэлсүхийн Засгийн газрын Ж.Бат-Эрдэнэ сайд багтаа авчээ. Төрийн албаны дарга нар төрийн яамныхаа өрөөнд архидаж, хүн амины аймшигт хэрэг яагаад гарав гэдгийг тодруулсан юм. Бусдын гарт амь насаа алдсан "Зам тээврийн хөгжлийн яам"-ны газрын дарга Г нь экс Ерөнхий сайд Ж.Эрдэнэбатын хүн аж. Тэрээр өнгөрсөн сонгуулиар УИХ-ын гишүүн Ж.Эрдэнэбатын сонгуулийн сурталчилгаанд ажиллажээ. Бусдын амь насанд хүрсэн хэргээр саатуулагдан шалгагдаж байгаа "Зам тээврийн хөгжлийн яам"-ны Төрийн захиргаа, удирдлагын газрын дарга М нь өмнө нь удаа дараа Г-г ажлаас халахыг Төрийн нарийн бичгийн дарга Ж.Бат-Эрдэнээс шаардаж байжээ. Г –г ажлаас нь чөлөөлөх тушаал гаргасангүй гэж М нь өмнө нь Төрийн нарийн бичгийн даргаа хүртэл барьж авч байсан тухай баттай эх сурвалж мэдээллэв. Ийнхүү МАН доторх зөрчилдөөн нэг газрын даргаа шороонд, нөгөө газрын даргаа шоронд илгээхээр болж байгаа бололтой юм.

Н.Өнөрцэцэг