ӨНӨӨДӨР ХАВРЫН ЧУУЛГАН ХААЛТАА ХИЙНЭ

УИХ-ын 2018 оны Хаврын ээлжит чуулган энэ сарын 29-ний баасан гарагт буюу өнөөдөр хаалтаа хийхээр УИХ-ын даргын дэргэдэх Зөвлөлөөс шийдвэрлэсэн билээ. УИХ-ын тухай хуулийн 15.1-д УИХ-ын намрын ээлжит чуулган аравдугаар сарын 1-ний өдрөөс дараа оны хоёрдугаар сарын 10-ны хооронд, хаврын ээлжит чуулган дөрөвдүгээр сарын 5-ны өдрөөс мөн оны долдугаар сарын 1-ний хооронд тус, тус хуралдахаар тусгасан.

Хэрэв ээлжит чуулганыг нээх, хаах өдрүүд амралт, баяр ёслолын өдөртэй давхацвал ажлын өдрийг шилжүүлдэг аж. Энэ жил долдугаар сарын 1 ням гарагт таарч буй тул УИХ-ын 2018 оны хаврын ээлжит чуулганыг энэ сарын 29-ны баасан гарагт хаахаар шийдвэрлэсэн байна.

УИХ-ын чуулганы нэгдсэн хуралдаан өнөөдөр 12 хууль, тогтоолын төсөл хэлэлцэхээр төлөвлөжээ. Чуулганы үдээс өмнөх хуралдаанаар хэлэлцэх асуудлын эхэнд "Тавантолгойн нүүрсний ордын үйл ажиллагааг эрчимжүүлэх талаар авах зарим арга хэмжээний тухай" тогтоол, УИХ-ын чуулганы хуралдааны дэгийн тухай хуулийн төсөл багтжээ.

Мөн "УИХ-ын 2010 оны 32 дугаар тогтоолын хавсралтад нэмэлт, өөрчлөлт оруулах тухай", "Төрөөс иргэний нисэхийн салбарт 2020 он хүртэл баримтлах бодлого"-д өөрчлөлт оруулах тухай тогтоол, Ус бохирдуулсны төлбөрийн тухай, Онцгой албан татвараас чөлөөлөх тухай болон Ерөнхий боловсролын сургуулийн хоол үйлдвэрлэл, үйлчилгээний тухай хуулийн төслийг хэлэлцэж, 2018 оны намрын ээлжит чуулганаар хэлэлцэх асуудлын жагсаалтаг батлахаар төлөвлөсөн байна.

Харин үдээс хойш буюу 15.00 цагт УИХ-ын гишүүдээс Ерөнхий сайд, ЗТХ-ийн сайл, ХЗДХ-ийн сайдад тавьсан гурван асуулгын хариуг сонсоно. Тухайлбал, Л.Мөнхбаатар гишүүн "Усан замын тээврийн тухай хуулийн хэрэгжилтийн явцын талаар" ЗТХ-ийн сайдад, М.Оюунчимэг гишүүн "Хүүхдийн хүчирхийллийн эсрэг хууль тогтоомжийн хэрэгжилт, Засгийн газраас энэ чиглэлээр хэрэгжүүлж байгаа ажлын талаар" ХЗДХ-ийн сайдад асуулга хүргүүлсэн.Харин З.Нарантуяа гишүүн "Гэр бүлийн хүчирхийлэлтэй тэмцэх тухай хуулийн хэрэгжилтийн талаар" Ерөнхий сайдад асуулга хүргүүлсэн юм.