​С.БАЯРЦОГТ, Б.БЯМБАСАЙХАН ХОЁРЫГ БАТЛАН ДААЛТАД ГАРГАЖЭЭ

Сангийн сайд асан С.Баярцогт, "Эрдэнэс Монгол" компанийн гүйцэтгэх захирал асан, эдийн засагч Б.Бямбасайхан хоёрыг батлан даалтад гаргаж, хилийн хориг тавих шийдвэрийг дөнгөж сая харьяа дүүргийн анхан шатны шүүхийн шүүгч нар гаргалаа.

Тэднийг батлан даалтад гаргаж, хязгаарлалт тогтоох хүсэлтийг өчигдөр НПГ-аас шүүхэд хүргүүлсэн бөгөөд ийнхүү өнөөдөр хэлэлцэж шийдвэрлэлээ.

Ингэснээр цагдан хоригдож байгаа Б.Бямбасайхан, С.Баярцогт хоёр өнөөдөр хорих ангиас суллагдаж, гэртээ харих юм. Тэднийг өмгөөлөгчид болон ар гэрийнхэн нь гаргаж авахаар яг одоо Цагдан хорих анги руу явах гэж байгаа талаар эх сурвалж хэллээ.

Өнгөрсөн хугацаанд хамт хоригдож байсан Ерөнхий сайд асан С.Баяр, Ч.Сайханбилэг хоёрыг биеийн байдлыг нь харгалзан үзэж батлан даалтад гаргасан бол өнөөдөр энэ хоёрыг үргэлжлүүлэн хорих шаардлагагүй, батлан даалтад гадуур байцаалтыг үргэлжлүүлэхээр гаргаж байгаа аж.

Ийнхүү Оюутолгойн хөрөнгө оруулалтын гэрээтэй холбогдуулан хоригдсон бүх хүмүүс хорих ангиас гарлаа. Тэдний хувьд 50 гаруй хоног хоригджээ.