ЧУУЛГАНЫ НЭГДСЭН ХУРАЛДААНААР 12 АСУУДАЛ ХЭЛЭЛЦЭНЭ

УИХ-ын чуулганы пүрэв, баасан гарагийн нэгдсэн хуралдаанаар 12 хууль, тогтоолын төсөл хэлэлцэхээр товлосон байна.

Хэлэлцэх асуудлын эхэнд "Монгол Улсын эдийн засаг, нийгмийг 2019 онд хөгжүүлэх үндсэн чиглэл батлах тухай" тогтоол, Монгол Улсын нэгдсэн төсвийн 2019 оны төсвийн хүрээний мэдэгдэл, 2020-2021 оны төсвийн төсөөллийн тухай хуулийн төслийн эцсийн хэлэлцүүлэг болон "Цахим бодлогын түр хороо байгуулах тухай" тогтоолын төсөл багтжээ.

Мөн хуралдаанаар "Хүүхдийн мөнгөн тэтгэмжийн хамрах хүрээг нэмэгдүүлэх талаар авах арга хэмжээний тухай", Согтуурах, мансуурах донтой хүнийг захиргааны журмаар албадан эмчлэх тухай хууль, "Төрийн өмчөөс аймаг, нийслэлийн өмчид эд хөрөнгө шилжүүлэх тухай" тогтоол, Ардчилсан хувьсгалын анхдагчдад төрөөс тусламж, хөнгөлөлт үзүүлэх тухай хуулийн төслийг хэлэлцэхээр төлөвлөсөн байна.

Түүнчлэн Орон нутгийн хамгаалалтын тухай, Дайчилгааны тухай хуулийн төсөл болон УИХ-ын гишүүн М.Оюунчимэгээс Монгол Улсын Ерөнхий сайдад тавьсан "Зээлийн хүүг бууруулах асуудлын хүрээнд Засгийн газраас авч хэрэгжүүлж байгаа арга хэмжээний талаар" асуулгын хариуг сонсох юм.