ОЮУТОЛГОЙ ТӨСЛИЙН ҮР АШИГ, ӨГӨӨЖИЙГ НЭМЭГДҮҮЛЭХ ЛОББИ БҮЛЭГ БАЙГУУЛАВ

УИХ-ын гишүүн Ч.Улаан тэргүүтэй 14 гишүүн "Оюутолгой төслийн үр ашиг, өгөөжийг нэмэгдүүлэхийн төлөө" лобби бүлэг байгуулсан талаараа өнөөдөр сэтгүүлчдэд мэдээлэл хийлээ. УИХ-ын гишүүдийн үүсгэн байгуулж байгаа лобби бүлэг нь Оюутолгойн ордыг ашиглах төслийн хөрөнгө оруулалтын болон хувь нийлэгчдийн гэрээг сайжруулах, төслийн эдийн засгийн үр ашиг, өгөөжийг Монгол Улсад ашигтайгаар нэмэгдүүлэхийн төлөө ажиллах аж. Мөн Оюутолгойн далд уурхайн бүтээн байгуулалт, санхүүжилтийн төлөвлөгөө /Дубайн гэрээ/-ний алдааг засч шинэчлэн байгуулах асуудалд анхаарал хандуулж ажиллаж санал, дүгнэлтээ УИХ-аас байгуулсан "Оюутолгой ордыг ашиглах хөрөнгө оруулалтын гэрээний хэрэгжилтийг шалгаж, санал дүгнэлт гаргах" гэнэ. Ажлын хэсэг гаргасан дүгнэлтээ Засгийн газарт албан ёсоор хүргүүлэх юм байна.

Энэ талаар УИХ-ын гишүүн Ч.Улаан "Оюутолгой төслийн үр ашиг, өгөөжийг нэмэгдүүлэх талаар ажил хэрэгч санал гаргаж байгаа төрийн болон ТББ-тай хамтран ажиллахаар лобби бүлэг байгууллаа. Оюутолгойн асуудлаар өмнө нь олон ажлын хэсгүүд гарч ажиллаж байсан. Энэ бүгд дүгнэлт гаргадаг боловч төрийн бодлого үйл ажиллагаа болж хэрэгжиж чадаагүй. Энийг хүлээн зөвшөөрөхөөс аргагүй. Өнөөдөр нөхцөл байдал өөрчлөгдөж байна. Төрийн өндөрлөгүүдийн байр суурь маш тодорхой болсон. Ажлын хэсэг гараад ажиллаж байна. Энэ ажлын хэсэг Оюутолгойн гэрээ түүний хэрэгжилттэй холбоотой асар их материалыг судалж, тооцоо үндэслэлийг судалж цаг хугацаатай уралдан ажиллаж байгаа. Тийм учраас үүнийг дэмжиж лобби бүлэг байгуулан хамтран ажиллахаар санал нэгдсэн. Манай бүлэг Оюутолгой төслийн үр ашиг, өгөөжийг нэмэгдүүлэхийн төлөө тууштай ажиллах болно" гэв