ЕРӨНХИЙЛӨГЧ Х.БАТТУЛГЫН 4-Р САРЫН ҮЙЛ АЖИЛЛАГААНЫ ҮНЭЛГЭЭ БУУРЛАА

МЭК судалгааны компани дөрөвдүгээр сарын Ерөнхийлөгч, Ерөнхий сайд, УИХ-ын үйл ажиллагаанд иргэд ямар үнэлэлт дүгнэлттэй байгааг судаллаа. Судалгааг Улаанбаатар хотод оршин суудаг 800 иргэнээс 4-р сарын 29-30-ны өдрүүдэд квотчилсон санамсаргүй түүврийн аргаар цуглуулсан байна.

Иргэд Ерөнхийлөгч Х.Баттулгын 4-р сарын үйл ажиллагааг үнэлэхдээ 10 онооноос зургаан оноо өгсөн байна. Энэ нь 3-р сарынхтай харьцуулахад 0.1 хувиар буурсан үзүүлэлт юм.

Харин УИХ-ын үйл ажиллагаанд иргэд 10 онооноос 3.2 оноо өглөө. Энэ нь өнгөрсөн 3-р сарынхтай харьцуулахад 0.2 хувиар өссөн үзүүлэлт юм.

Ерөнхий сайд У.Хүрэлсүхийн үйл ажиллагааг 10 онооноос 4.9 оноогоор үнэллээ. Энэ нь өнгөрсөн сарын үнэлгээтэй харьцуулахад тогтвортой байгаа юм. Өнгөрсөн сард ч 4.9 оноогоор түүний үйл ажиллагааг үнэлсэн билээ.

Харин Нийслэлийн Засаг даргын үйл ажиллагаанд иргэд 10 онооноос 3.3 оноо өглөө. Энэ нь өнгөрсөн сарын үзүүлэлттэй харьцуулахад 0.3 хувиар өссөн үзүүлэлт юм. Харин 2016 оны 4-р сард Хотын дарга байсан Э.Бат-Үүлийн үнэлгээ нь 4.7 оноо байсан юм. Түүний үзүүлэлтээс даруй 1.4 оноогоор бага үнэлгээг С.Батболд авлаа.

Улс төрийн намын үйл ажиллагааг иргэд үнэлэхдээ Ардчилсан намд 3.6 оноо өгч Монгол Ардын Намд 3.4 оноо өглөө.

Харин иргэдээс аль улс төрийн намыг дэмжиж байгаа асуухад МАН-ыг дэмжигчдын хувь 13% байгаа бол Ардчилсан намыг дэмжигчдын хувь 18 % байна. МАХН-ыг дэмжигчдын хувь 7% байгаа бол ямар ч нам дэмжээгүй иргэдийн хувь 60 % байна.

Энэхүү судалгааг МЭК компани сар бүр ямар нэгэн нам, байгууллага, хувь хүний захиалгаар бус өөрийн санхүүжилтээр гүйцэтгэдэг юм.