ДОНАЛЬД ТРАМПЫГ НОБЕЛИЙН ЭНХТАЙВНЫ ШАГНАЛ ХҮРТЭХ ГАВЬЯАТАЙ ХҮН ГЭЖ ӨМНӨД СОЛОНГОСЫН ЕРӨНХИЙЛӨГЧ ХЭЛЛЭЭ

Солонгосын хойгт энх тайван тогтоох үйлсэд гүйцэтгэсэн үүргийнхээ төлөө Дональд Трамп Нобелийн энхтайвны шагнал хүртэх гавьяатай гэж Өмнөд Солонгосын ерөнхийлөгч Мүүн Жэ Ин хэлсэн тухай Сөүлийн албаныхан мэдээлжээ.

Даваа гарагт албан тушаалтнуудтай уулзах үеэрээ тэр ингэж хэлснийг ерөнхийлөгчийн Хөх ордны хэвлэлийн төлөөлөгч мэдэгдсэн байна.

Өмнөд Солонгосын ерөнхийлөгч агсан Ким Дэ Жуны бэлэвсэн эхнэр Ли Хэ Хо өчигдөр Мүүн Жэ Инд баяр хүргээд түүнийг Нобелийн шагнал хүртэх ёстой хүн гэж хэлсэн гэнэ.

Харин Мүүн Жэ Ин хариуд нь уг шагналыг өөрөө биш, АНУ-ын ерөнхийлөгч хүртэх ёстой гэж хэлсэн байна.

Өнгөрсөн Баасан гарагт болсон хоёр Солонгосын дээд хэмжээний уулзалтаар Солонгосын хойгийг цөмийн зэвсгээс ангижруулах, Солонгосын дайныг албан ёсоор дуусгах тохиролцоог хийсэн юм. Трампын өмнөх ерөнхийлөгч Барак Обама 2009 онд ерөнхийлөгчөөр сонгогдоод хэдхэн сар болсныхоо дараа Нобелийн энхтайвны шагналыг хүртэж байв. Гэвч Обамагийн шагнал яг ямар шалтгаанаар олгогдсон нь тодорхой бус байдаг. Шагнал гардаж авахдаа ч Обама гайхаж байгаагаа нуугаагүй. Харин шагнал авсан жилээ тэр Афганистан дахь АНУ-ын цэргийн тоог гурав дахин нэмэгдүүлэх шийдвэр гаргаж байв.

Обамагаас гадна АНУ-ын гурван ерөнхийлөгч Нобелийн энхтайвны шагнал хүртэж байсан нь Теодор Рузвельт, Вудроу Уилсон, Жимми Картер нар юм.

Эх сурвалж: Reuters