500 АЖЛЫН БАЙР БҮХИЙ ХӨДӨЛМӨРИЙН ЯАРМАГ 17.00 ЦАГ ХҮРТЭЛ ҮРГЭЛЖИЛНЭ

Улаанбаатар чуулгын хоёр давхарт 500 ажлын байр танилцуулж, зуучлах "Аялал жуулчлал ба ажил эрхлэлт" хөдөлмөрийн яармаг болж байна.

Яармаг 17.00 цаг хүртэл үргэлжлэх бөгөөд нийслэлийн зургаан дүүргийн Хөдөлмөрийн хэлтэст бүртгэлтэй ажлын байранд шууд зуучлах бол нээлттэй ажлын байр зарласан жуулчны бааз, тур оператор, зоогийн газар, зочид буудлын ажил олгогчид байгууллагаа танилцуулан, ажилд шалгаруулж авах юм.Жуулчны идэвхтэй улирал эхэлж байгаатай холбогдуулан жуулчны бааз, тур оператор компани, зочид буудал, зоогийн газар зэрэг аялал жуулчлалын чиглэлээр үйл ажиллагаа явуулдаг байгууллагуудаас нээлттэй ажлын байруудыг зарлаад байгаа нь энэ юм.

"Аялал жуулчлал ба ажил эрхлэлт" хөдөлмөрийн яармагийн гол зорилго нь аялал жуулчлалын салбарт ажиллах сонирхолтой оюутан залуус, иргэдийг эзэмшсэн мэргэжлийн дагуу түр болон байнгын ажлын байртай болгох, аялал жуулчлалын байгууллагуудад шаардлагатай ажилтныг олоход нь дэмжлэг үзүүлэх, ажил олгогч, ажил хайгч иргэдийг холбох юм.

Нээлтийн үеэр нийслэлийн Аялал жуулчлалын газрын дарга Д.Батсүх "Монгол Улсад өнгөрсөн 2017 онд ирсэн гадаадын жуулчдын тоо 471 мянгад хүрч Монгол Улсын эдийн засагт 400 сая ам долларын орлогыг оруулсан байна. Үүнийг дагаад аялал жуулчлалын салбарт ажиллах хүчний эрэлт хэрэгцээ нэмэгдэж байна. Энэхүү хөдөлмөрийн яармаг нь оюутан залуучуудыг зуны амралтаа үр бүтээлтэй өнгөрөөх, мэдлэг чадвараа дээшлүүлэх, өөрийгөө нээн хөгжүүлэх боломжийг олгодог" гэдгийг яармагийн нээлтийн үеэр дурджээ.

Харин Нийслэлийн Залуучуудын хөгжлийн газрын дарга С.Сүх-Очир аялал жуучлалын салбарт хөдөлмөр эрхлэх сонирхолтой залуучуудад зориулсан аяллын хөтчийн анхан шатны мэдлэг олгох үнэ төлбөргүй сургалт тавдугаар сарын эхний долоо хоногт болно гэдгийг энэ үеэр мэдээлсэн байна.

Хөдөлмөрийн яармаг нь арав дахь жилдээ зохион байгуулагдаж байгаа бөгөөд энэ үеэр "Оюутан цагдаа" хөтөлбөрт хамрагдах сонирхолтой оюутнуудыг бүртгэх юм