ХЭНТИЙ АЙМАГТ АНХ УДАА НОГООЧДЫН ЗӨВЛӨГӨӨНИЙГ ЗОХИОН БАЙГУУЛЛАА

Хэнтий аймгийн Засаг даргын Тамгын газар, Хүнс хөдөө аж ахуйн газар, Каритас Чех ОУБ хамтран "Хэнтий аймгийн ногоочдын зөвлөгөөн"-ийг өнөөдөр зохион байгууллаа.

АЗДТГ-аас жил бүр газар тариалан эрхлэгчдийн зөвлөгөөнийг зохион байгуулдаг хэдий ч энэ удаад зөвхөн ногоочдыг хамруулсан зөвлөгөөн зохион байгуулж буйгаараа онцлог юм. Тус зөвлөгөөнд 18 сум 5 тосгоны 90 гаруй ногоочид хүрэлцэн ирж, хүнсний ногооны салбарын 2017 оны ажлын үр дүн, тулгамдаж буй асуудлууд шийдвэрлэх арга замын талаар хэлэлцэж байна.

Зөвлөгөөний нээлтэд аймгийн Засаг дарга Н.Ганбямба оролцож орон нутгийн зүгээс ногоочдыг дэмжих тал дээр баримталж буй бодлогын талаар танилцуулсан юм. Хэнтий аймаг өнгөрсөн жилүүдэд нийт хүн амынхаа хүнсний ногооны хэрэгцээний 20 хувийг хангаж ирсэн бол өнгөрсөн онд аймгийн нийт хүн амын төмсний хэрэгцээний 80 хувь, хүнсний хэрэгцээний 60 хувийг тус тус хангажээ. Мөн Хэрлэн, Өмнөдэлгэр, Мөрөн, Биндэр сумд төмс хүнсний ногооны хэрэгцээгээ дотооддоо 100 хувь хангасан байна.

Цаашдаа иргэдийнхээ хүнсний ногооны хэрэгцээг бүрэн хангах зорилгоор аймаг, орон нутгийн зүгээс ногоочдод элит сортын төмс, хүнсний ногооны үр, технологийн гарын авлагыг тараах, атаршсан тариалангийн талбайг эргэлтэд оруулж, хүнсний ногоо, жимс жимсгэнэ тариалах иргэдэд газар шинээр олгох, иргэд ААН-ын санал санаачлагыг дэмжих, урт богино хугацааны зээлийн дэмжлэгт хамруулах, 3 улирлын хүлэмж, зоорийг ОУБ, төсөл хөтөлбөрүүдтэй хамтран барьж ашиглалтад оруулах, аймгийн Засаг даргын захирамжаар өөрийн хөрөнгөөр 30 тонноос дээш багтаамжтай зоорь барьсан иргэд, хоршоо, бүлгийг урамшуулах зэрэг арга хэмжээг хэрэгжүүлж байна