ИРГЭНШЛЭЭ СОЛЬСОН Х.ЖЕКЕЙН БРИГАДЫН ГЕНЕРАЛ ЦОЛЫГ ХУРААЛАА

Монгол Улсын Ерөнхийлөгч Х.Баттулга өнөөдөр Дээд цол хураан авах тухай зарлиг гаргалаа.

ЗАРЛИГТ:

Монгол Улсын Үндсэн хуулийн Гучин дөрөвдүгээр зүйлийн 1, Монгол Улсын Ерөнхийлөгчийн тухай хуулийн 9 дүгээр зүйлийн 1, Цэргийн албаны тухай хуулийн 28 дугаар зүйлийн 28.2 дахь хэсэг, Монгол Улсын Ерөнхийлөгчийн 2018 оны 3 дугаар сарын 27-ны өдрийн "Монгол Улсын харьяатаас гаргах тухай" 32 дугаар зарлигийг тус, тус үндэслэн ЗАРЛИГ БОЛГОХ нь:

Монгол Улсын харьяатаас гарсан Халидалдагийн Жекейд олгосон дээд офицерын "бригадын генерал" цолыг хураан авсугай" гэжээ.

Бригадын генерал цолтой Х.Жекей нь 2000, 2008 онуудад Баян-Өлгий аймгаас УИХ-д сонгогдож байсан юм. Мөн Хил хамгаалах ерөнхий газрын дэд дарга, Хууль зүйн байнгын хорооны даргын албыг хашиж байжээ.

Тэгвэл улсын том албыг хашиж байсан хүн яагаад харьяатаа солих болсон шалтгааныг Ерөнхийлөгчийн тамгын газраас тодруулахад, "Харьяатаас гарах эсэх нь хувь хүний л асуудал. Аль улсын харьяат болох гэж байгааг мэдэхгүй" гэлээ.

Х.Жекейг манай улсын харьяатаас гарч "Казахстаны тагнуул болох гэж байна" гэх мэдээлэл анх 2014 онд хэвлэлээр гарч байжээ.