БСШУС-ЫН САЙД Ц.ЦОГЗОЛМАА АШИГ СОНИРХЛЫН ЗӨРЧИЛТЭЙ ТОМИЛГОО ХИЙСЭН ҮҮ?

МАН-ын засаг гарч ирснээс хойш энэ яам гурван сайд, хоёр төрийн нарийн бичгийн даргын нүүр үзээд буй. Шинэ сайд Ц.Цогзолмаа салбартаа шинэчлэл хийж, ажилчдаа хална гэж хэлж гарч ирсэн даруйдаа яамныхаа Төрийн нарийн бичгийн дарга Ж.Болормааг ажлаас нь халсан байдаг. Засгийн газарт өргөн мэдүүлсэн бичигтээ түүнийг халах болсон шалтгаанаа "Сайдаар томилогдсон хугацаанд надтай хамтран ажиллаагүй, надад туслаагүй" гэж тайлбарлан байна. Ямартаа ч Ц.Цогзолмаа сайдад "гомдсон" Ж.Болормаа ийнхүү АТГ-т ханджээ. АТГ-аас дээрх хэргийг шалгаж байгаа эсэхийг тодруулахад "БСШУС-ын яамны Төрийн нарийн бичгийн даргаар ажиллаж байсан Ж.Болормаагаас Ц.Цогзолмаа сайд болон Төрийн захиргаа удирдлагын газрын даргын үүргийг түр орлон гүйцэтгэгч С.Мөнхөөлэй нарыг ашиг сонирхлын зөрчилтэй гэх гомдол мэдээллийг АТГ-т ирүүлсэн. Гомдол мэдээлэлд хяналт шалгалт хийх явцад буюу 2017 оны арванхоёрдугаар сарын 27-ны өдөр гомдол гаргагч дахин нэмж шалгуулах зүйл байна гэж бичгээр гомдол гаргасан. Үүний дараа 2018 оны нэгдүгээр сарын 8-ны өдөр дахин нэмж гомдол гаргасан. Ингээд гурван удаа гомдол гаргасан учраас АТГ хяналт шалгалтын хүрээнд С.Мөнхөөлэй гэдэг хүний томилгоотой холбоотой асуудал хууль тогтоомжид нийцсэн үү, үгүй юу гэдгийг шалгуулахаар Төрийн албаны зөвлөлд албан бичиг хүргүүлсэн. Албан бичгийн хариу одоогоор ирээгүй байна. Хяналт шалгалт хийгдэж байгаа" гэсэн хариуг өгч байна.