ТӨРИЙН ӨНДӨРЛӨГҮҮД АЙЛЧЛАЛД МОРДОНО

2018 он Монголын төрийн гурван өндөрлөгийн хувьд албан айлчлалд ач холбогдол өгч эхлэх жил байх бололтой. Ерөнхий сайд У.Хүрэлсүх энэ онд хоёр хөршийн харилцаанд онцгойлон анхаарахыг өнгөрсөн арванхоёрдугаар сард чуулганы хуралдаанд мэдээлэл хийхдээ онцолсон. Монгол Улсын төрийн тэргүүн, УИХ-ын дарга, Ерөнхий сайдын гадаад айлчлал Монгол Улсын нийгэм, эдийн засагт чухал үүрэгтэй. Анхны албан ёсны төрийн айлчлалаа хараахан эхлээгүй байгаа Ерөнхийлөгчид төрийн тэргүүн болсных нь дараа Бүгд найрамдах Энэтхэг улсын Ерөнхий сайд өөрийн улсдаа айлчлах захидал илгээсэн. Тиймээс Ерөнхийлөгчийн анхны айлчлал Энэтхэгээс эхэлж магадгүй юм. Ерөнхий сайд У.Хүрэлсүхийн хувьд ОХУ-д айлчлахаар бэлтгэл базааж байгаа гэгдэж буй ч шинэ оны эхэнд эхлээд БНСУ-д айлчлахаар яригдаж байгаа гэх мэдээллийг тэрбээр өгсөн. Цаашлаад энэ онд БНХАУ болон бусад улсад айлчлах асуудал ч төлөвлөгдөж байгаа аж. Ерөнхийлөгч, Ерөнхий сайд нар гадаад улсад айлчлахдаа улстөрчдөөс гадна бизнесийнхнийг хамруулж, бизнесийн уулзалт хийх хэрэгтэй гэдэг дээр санал нэг байгааг Ерөнхий сайд У.Хүрэлсүх онцолсон юм