ШУУД: Ц.НЯМДОРЖ САЙД МЭДЭЭЛЭЛ ХИЙЖ БАЙНА

Хууль зүй, дотоод хэргийн сайд Ц.Нямдорж Эрдэнэтийн 49 хувийг авсан бүлэглэл, С.Зоригийг хөнөөсөн хэргийг шалгасан тагнуулынхантай сөргөлдөж хууль зөрчжээ. Тодруулбал, Ц.Нямдорж сайд "Цензургүй яриа" нэвтрүүлэгт оролцох үеэрээ шүүхийн шийтгэх тогтоолыг олон нийтэд харуулж, бас уншиж өгсөн. Энэ тогтоол бол Улсыг аюулаас хамгаалах байгууллагын дарга асан хошууч генерал Ж.Баатарын Ц.Нямдоржийг "Хятадын тагнуул" хэмээн гүтгэснийг нотлох баримт. Хэдий тийм боловч дээрх шүүхийн тогтоолыг олон нийтэд харуулах ёсгүй, бас хориотой гэдгийг эрхэм сайд мэдэх учиртай. Учир нь, Ж.Баатарт холбогдох хэргийг өнөөдрийг хүртэл төрийн нууцаас гаргаагүй, нууцаас гаргаагүй тул шийтгэх тогтоол өөрөө төрийн нууц. Иймээс Ц.Нямдорж сайд төрийн нууцад хамаарах мэдээ баримтыг "Цензургүй яриа" нэвтрүүлэгт оролцох үеэрээ олон нийтэд задруулсан хэмээн эрүүгийн хэрэгт шалгагдаж мэдэх нь.

Ц.Нямдоржид төрийн нууцад хамруулсан шүүхийн шийтгэх тогтоолыг хэн өгөв. Тэр яаж олж авав. Нууцын архивт хадгалдаг хавтаст хэргээс олж авсан уу, албан ёсоор шүүх түүнд хүлээлгэн өгөв үү гэх мэт олон асуулт дагаж байна.