З.ЭНХБОЛД & Ч.ХҮРЭЛБААТАР

Монголын Улстөрчид бие биенийхээ тухай ноцтой, хууль бус баримтуудыг дэлгэдэг. Гэвч энэ нь үнэн худал нь үл мэдэгдэх оньсого хэвээр үлддэг жишиг тогтсон гэхэд болно. УИХ-ын гишүүд, Ерөнхийлөгч, Ерөнхий сайд төрийн дээд албан тушаал хашиж байгаа хүмүүсийн талаар байж боломжгүй, ёс зүйгүй, хууль ёсыг уландаа гишгэлсэн үйлдлүүдийг ярьдаг. Гэвч энэ нь үнэн үү? худлаа юу? гэх асуултын алинд нь ч эцсийн хариулт ирдэггүй. Сүүлийн үед ТЕГ-ын дарга Б.Хурц, Хууль зүйн сайд Ц.Нямдорж хоёрын дунд "дайн" үүсээд байгаа бол Ерөнхийлөгчийн тамгын газрын дарга З.Энхболд, Сангийн сайд Ч.Хүрэлбаатар нарын дунд ч бас л учир ургачихаад байгаа юм. Эдгээр хүмүүс бүгд л хариуцлагатай албан тушаалд олон жил ажилласан эрхмүүд. Чухам хэнийх нь үг үнэн, хэнийх нь үг худал болох нь нууц хэвээр цааш үргэлжлэх биз.

Ингээд тэдний хувийн цахим хуудсаараа бичсэн зүйлийг та бүхэндээ хүргэе.

Ч.Хүрэлбаатар

Би болон манай ах нар ямар нэг Уул уурхайн лиценз өмнө нь болон одоо эзэмшиж, зарж байгаагүйг батлах баримт. Сайт руу орж шалгана уу?!!! Монголд их муухай 30 гэр бүл байгаа түүнийг АМГТГ-ын сайт руу ороод шалгах замаар тогтоодог гэж ЕТГ-ын дарга З.Энхболд БХ-ы хурлын үер хэлсэн. Үүний дагуу энэ тодорхойлолтыг авсан юм, фэйсбүүк хэрэглэгч Та ч сайт руу ороод шууд шалгаж үзэх боломжтой. З.Энхболд та гүтгэлэг тараахаа болино уу!!!!

З.Энхболд

Сангийн сайд Чимидийн Хүрэлбаатарын төрсөн ах нар болох Чимидийн Гантулга, Чимидийн Гансүх, мөн зөвлөх К.Дэмбэрэл нар Увс аймгийн Бөхмөрөн сумын Хотгор шанагын уурхайг Солонгосын компанид 2 сая доллараар заржээ. Монгол улсын үндсэн хуулийн 6.1-д заасан ард түмний мэдэлд байх нийтийн өмчийг лиценз нэрээр авсан сангийн сайдын хамаатнууд зарж л байг уу? Төрийн өмчийн нэг муу амбаарыг хүртэл дуудлагын худалдаагаар зарж мөнгийг нь улсын төсөвт оруулдаг биз дээ. Ийм хүмүүсийг ядаж битгий сайд болооч гэж Ерөнхийлөгч хориг тавьсан, энэ 7 хоногт УИХ-аар хэлэлцэнэ. МАН-ын бүлгийн 65-аас хэд нь өөрсдийн бүтээгээгүй ард түмний өмч байгалийн баялгийг үнэгүй хувьчилж авсан 30-н гэр бүлийн талд кнопдохийг харах л үлдлээ.

Н.ЦЭНДБАТ