О.БААСАНХҮҮ: Ц.НЯМДОРЖИЙН ГЭМТ БУРУУТАЙ ЭСЭХИЙГ ШҮҮХ ТОГТООХ ЁСТОЙ

УИХ-ын гишүүн О.Баасанхүү өнөөдөр Хууль зүй, дотоод хэргийн сайд Ц.Нямдорж болон МАХН-ын талаар сэтгүүлчдэд мэдээлэл хийлээ.

Тэрбээр "Тагнуулын ерөнхий газрын дарга өчигдөр мэдээлэл хийсэн. Энэ үйлдэл нь цочирдсон, айсан, албан тушаалаа өгөх гэж сандарсан гэнэн зүйл гэж харахгүй байна.

Нөгөө талаас Хууль зүйн сайд Ц.Нямдорж тодорхой асуудлуудыг цэгцлэх тухай ярьсныг буруу гэж би бодохгүй байна.

Хамгийн гол нь "Эрдэнэт" үйлдвэрт хийсэн 42 сая доллар шахааны бизнесийн тухай юм. Би Орхон аймгаас сонгогдсон. Эрдэнэтэд олон иргэн ядуу, ажилгүй зовдог нь шахааны бизнес юм. 1990-ээд оноос хойш шахааны бизнес газар авсан. Би Авлигатай тэмцэх газарт олон материал өгсөн. Тийм учраас Хууль зүйн сайд нь хүртэл иймэрхүү зүйл ярьж байгаа бол энэ асуудлын үнэн худлыг, мөн яагаад шахааны бизнест холбогдох болсныг нь бид сонсох ёстой. Хэрвээ энэ асуудал үнэн бол гэмт хэрэгт тооцогдоно. Хууль зүйн сайд нь дээр үед болсон явдал гээд яриад байж таарахгүй. Би эцэг хүний хувьд хүүхдэдээ тусалсан, миний багшийн хүүхэд байгаа юм гэж яриад байна. Тэгэхээр үүнийг шалгаж, гэм буруутай эсэхийг шүүх тогтоох ёстой" гэлээ.

Харин МАХН дотор үүссэн асуудлын тухайд "Би өмнө нь МАХН шинэчлэл хийх ёстой" гэж хэлсэн. Дараа нь МАХН-ын Бага чуулганы 73 гишүүн удирдлагуудад шаардлага өгсөн. Намын дүрэмд гуравны нэгийн шаардлагыг эс биелүүлбэл бага хурлыг хуралдуулна гэж заасан байдаг. Бидний хүргүүлсэн шаардлагад намын их хурлаа хийе гэх ганцхан зүйл тусгагдсан. Уг нь манай дүрэмд хоёр жилд нэг удаа намын их хурлыг хийнэ гэж заасан. Намын дарга дөрвөн удаа улирч сонгогдож болно, цаашдаа улирах эрхгүй гээд дүрэмдээ заасан байгаа. Дээрээс нь гүйцэтгэх товчооны гишүүдийн дөрөвний нэгийг сольж болох ч, өөр хүмүүсийг солих эрхгүй.

Энэ бүх асуудал өнөөдөр зөрчигдөөд байгаа учраас энэ их хурлыг хийе гэсэн шаардлага тавьсан. Гэтэл зөв шударга шаардлага тавьсныхаа төлөө дормжлуулах боллоо. Хэрэв ийм байдлаар асуудалд хандвал МАХН ХҮН шиг бутраад алга болно.

Би МАХН-ыг хагалан бутаргах биш, аврахыг, 30 гэр бүлд үйлчилдэг биш, Монгол Улсын иргэдэд үйлчилдэг болгохын төлөө ажилласаар ирсэн" гэсэн юм.