Ц.НЯМДОРЖИД ТЕГ-ЫН ДАРГА Б.ХУРЦЫГ АЖЛААС ЧӨЛӨӨЛӨХ ЭРХ МЭДЭЛ ДУТНА

Ц.Нямдоржид би итгэхгүй байна.Тиймээс ТЕГ-ын байгууллагад гар хүргэмээргүй байна. Би Монгол Улсын үнэмлэхтэй энэ улсын иргэн байна. Би тагнуулын байгууллагад итгэл алдармааргүй байна. Тиймээс энэ байгууллагаар улстөрчид тоглохыг зөвшөөрмөөргүй байна.

Ц.Нямдоржид хангалттай цаг хугацаа, хангалттай эрх мэдэл байсан. Гэвч салбараа "дампууртал" хаа юу хийв?

Ц.Нямдорж хүн амины хэргийн гэрч, гэвч хэрэгтэн шүүхийн байгууллагыг толгойлж байхад яагаад хуруугаа ч хөдөлгөсөнгүй вэ?

Тэгэхээр Ц.Нямдорж үнэхээр шударга хүн мөн үү?

Шүүхийн ерөнхий зөвлөлийн дарга лүндэндоржийг алуурчин гэж мэдэгдэж байсан ц.нямдорж, алуурчинд ял оноосон цагт түүнд би итгэнэ.

Тагнуулын байгууллагыг би нүдтэй зүйрлэнэ... Би энэ байгууллагыг хайрлаж байна. Тиймээс олон жил намайг хуурсан улстөрчдөд би итгэхгүй байна.

Ц.Нямдоржийн хувьд насаараа улстөрд байлаа. Ялангуяа хууль зүйн салбарт. Гэхдээ ийнхүү ажиллаж байхдаа яагаад шударга ёс, тэгш эрх, салбарт үүсээд байгаа нөхцөл байдлын хажуугаар нүдэн балай, чих нь дүлий өнгөрсөн юм бэ?

Хууль зүйн сайд Ц.Нямдорж өөрийнх нь тухай ноцтой мэдээллийг олон нийтэд ил болгонгуут яагаад Б.Хурцыг ажлаас нь хална гэж мэдэгдэв. Түүний энэхүү үйлдэл хууль ёсны байж чадах уу? Тагнуулын байгууллага бол Үндэсний аюулгүй байдлын төлөө ажилладаг тусгай үүрэгтэй байгууллага. Энэхүү байгууллагаар улстөрчид дур зоргоороо тоглоом хийх нь хэр зохимжтой вэ?

ТЕГ-ын даргыг 6 жилийн хугацаатай томилдог. Яагаад гэвэл улстөрчдийн тоглоом болгохоос болгоомжилсон хэрэг биз. Харин ТЕГ-ын дарга, дэд даргыг үүрэгт ажлаас нь чөлөөлөх 4 хөн шалгаан байгаа.

14.3.1.өөрөө хүсэлт гаргасан;
14.3.2.биеийн эрүүл мэндийн байдлын улмаас үүрэгт ажлаа гүйцэтгэх боломжгүй болсон;
14.3.3.бүрэн эрхийн хугацаа дуусгавар болсон.
14.4.Тагнуулын ерөнхий газрын дарга, дэд дарга гэмт хэрэг үйлдсэн нь нотлогдож, шүүхийн шийтгэх тогтоол хүчин төгөлдөр болсон бол энэ өдрөөс эхлэн түүнийг албан тушаалаас нь огцруулсанд тооцно.

Ингэж заасан байдаг. Тэгвэл Б.Хурцыг ажлаас чөлөөлөх үндэслэл байна уу?

Энэ асуудалд Улс орныхоо, ард түмнийхээ нийтлэг эрх ашгийн төлөө ажиллана хэмээн ам тангараг өргөсөн Ерөнхий сайд хэрхэн хандах бол...?

ТЕГ-ын даргыг ажлаас нь чөлөөлөх дээрх шалтгаанууд үгүй бол ажлаас нь чөлөөлөхийг хориглосон байдаг. Тагнуулын байгууллагын тухай хуулийн 14.5.Хуульд зааснаас бусад үндэслэлээр Тагнуулын ерөнхий газрын дарга, дэд даргыг үүрэгт ажлаас нь чөлөөлөх, бүрэн эрхийг нь түдгэлзүүлэх буюу огцруулахыг хориглоно гэж заасан байна.

Б.Хурцын хувьд ажлаас чөлөөлөгдөх үндэслэл одоогоор харагдахгүй байна. Өөрийн хүсэлтээрээ ажлаас чөлөөлөгдөх хүсэлт өгөх байсан бол Ц.Нямдорж сайдын талаар ноцтой мэдээлэл хийх байсан гэж үү? Түүнчлэн Б.Хурц ажлаас чөлөөлөгдөхөөс айж, хууль зүйн сайд Ц.Нямдоржийн талаар ноцтой мэдээлэл дэлгэх шаардлага байхгүй... Нэг үгээр хэлбэл түүнд рекэт хийх шаардлага байхгүй. Яагаад гэвэл бүрэн эрх нь хуулиараа ийнхүү хамгаалагдсан байгаа учраас...

ӨӨР ӨНЦӨГ

Магадгүй Б.Хурц өнөөдрийн үйлдлээрээ, тагнуулын байгууллага улс орныхоо язгуур эрх ашгийг хамгаалахад хэзээд бэлэн байгаа шүү.., бид сэрүүн байгаа шүү гэдгийг " амин хувийн болон бүлэглэлийн эрх ашгийн төлөө "олон нийтийг хуурч мэхлэн ажилладаг" албан тушаалын хэнээтнүүдэд сануулсан ч байж болох..!?

БАС НЭГ ӨӨР ӨНЦӨГ

Улстөрчдийг худалч гэж олон нийт цоллодог. Гэсэн ч итгэдэг. Эцсээ хүртэл хэнд нь итгэх вэ гэдгээ бид мэддэггүй. Магадгүй бид өнөөдөр улс орны үндэсний аюулгүй байдал, язгуур эрх ашгийг сахин хамгаалах үүрэг бүхий байгууллагадаа итгэвэл энэхүү газрын цаашдын үйл ажиллагаа улстөрчдөөс хараат бусаар явахад нь дэм болж ч болох юм.

Энэхүү үйл явдалд олон нийт бид хөнгөн хуумгай хандаж, туйлширч боломгүй санагдана.

Н.Цэндбат