С.ЧИНЗОРИГ: ТӨРИЙН АЛБАН ХААГЧДЫН БОДИТ ОРЛОГЫГ НЭМЭГДҮҮЛЭХ АРГА ХАЙНА

Хөдөлмөр, нийгмийн хамгааллын сайдаар өнгөрсөн долоо хоногийн Пүрэв гарагт томилогдсон С.Чинзориг сайд цаг үеийн асуудлаар хэвлэлд ярилцлага өгчээ. Түүний хамгийн түрүүнд хийх ажил бол багш, эмч, төрийн албан хаагчдын цалингийн асуудал. Гэхдээ ОУВС-тай Монгол Улс хамтран ажиллах гэрээ байгуулсан байгаа учраас энэ асуудлыг өөрсдийн хүслээр шийдэрлэх нь боогдмол байгаа юм. Гэхдээ салбарын шинэ сайд уг асуудал дээр ямар байр суурьтай байж, хэрхэн ажиллах талаар ийнхүү ярьжээ. Тэрбээр "Мэдээж хэрэг салбарт тулгамдаж буй хүндрэл бий. Орлогын боломж ямархуу байгаа билээ. Боломж байсан ч ОУВС-тай байгуулсан гэрээний дагуу 2017, 2018 онд төрийн албан хаагчдын цалинг нэмэхгүй гээд үүрэг хүлээчихсэн байгаа. Тиймээс цалин, тэтгэвэр нэмэхэд хүндрэлтэй. Нэгэнт эдийн засгийн хүндрэлээс гарахын тулд олон улсын байгууллагатай гэрээ хийсэн болохоор түүнийгээ хэрэгжүүлэх нь Засгийн газрын үүрэг. Нөгөө талаас нийгэмд бодитой үүссэн байгаа багш, эмч, төрийн албан хаагчдын цалинг нэмэх асуудалтай Засгийн газар нүүр тулж ямар нэгэн гарц хайх хэрэгтэй. Манай ард түмэн ярьдаг даа. Хонь бүрэн, чоно цатгалан гэж. Үүн шиг зарчим барьж асуудлыг шийдэхээс өөр аргагүй. Миний бодож буй хувилбар бол төрийн албан хаагчдын цалингийн санг нэмэгдүүлэхгүйгээр асуудлыг шийдэхэд хэцүү. Тиймээс нэмэгдэл, урамшуулал олгох замаар төрийн албан хаагчдын бодит орлогыг нэмэгдүүлэх арга хайна. Тодорхой шийдэлд хүрээд саналаа Засгийн газарт оруулна гэж бодож байгаа. Иймэрхүү тулгамдсан асуудлаас ажлаа эхлээд явна даа" гэв.

Б.Ирээдүй