МАН МАНДАХ УУ, МӨХӨХ ҮҮ ГЭДГЭЭ БАГА ХУРЛААРАА ШИЙДНЭ

МАН-ын ээлжит бага хурал энэ сарын 25-ны өдөр болно. Энэ удаагийн Бага хурал их олон асуудлыг хагалж, хариу тайлбарыг гаргах учиртай. Ганцхан өгүүлбэрээр тодорхойлоход МАН мандах уу, мөхөх үү гэдгийг шийдэх Бага хурал товлогдчихоод байна. Ерөнхийдөө 2017 оны Ерөнхийлөгчийн сонгуулиас хойш улстөрийн хүрээнд өрнөсөн үйл явдлын хайнааг энд хагалах хэмжээнд асуудал ужгирчихсан учраас ийнхүү МАН-ын Бага хурал хүлээлт үүсгэжээ. Тодруулбал МАН-ын Бага хурал бол тус намын Их хурлаас төлөөлөн сонгогддог удирдах дээд байгууллага нь юм. Тиймдээ ч жирийн гишүүд, дэмжигчдийнхээ үгэнд орохоо байж хоёр талцсан 65 гишүүн, байгуулсан Засгийн газраа цаг бусаар унагадаг 32 гишүүнийг, тогтвортой байдлыг хүссэн 33-аасаа бүх сэтрийг нь хураах уу гэдэгээ зөвхөн энэ л өдөр дүгэнэнэ.

Нөгөө талаар МАН хариуцлагын дүрмээ хэрэгжүүлэх үү гэдэг хүлээлт бий. Нэг ёсондоо Шадар сайд У.Хүрэлсүх 2017 оны Ерөнхийлөгчийн сонгуулиар мэдэгдэхүйц эсрэг ажилласныхаа дараа араасаа 31 хүн дагуулан Засгийн газраа унагасан тохиолдлыг лав зүгээр өнгөрөөхөөргүй болсон. Намаасаа урвасан, намынхаа эсрэ болон нэрдэвшигчийн эсрэг ажилласан тохиолдолд хариуцлага тооцох дүрэмтэй нам. Хамгийн сүүлийн жишээ гэвэл дөрөвхөн жилийн өмнө Ц.Даваасүрэн гишүүнийг намаа шүүмжиллээ хэмээн хөөж л байсан. Харин намаа унагасан, хоёр талцуулсан хүмүүст ямар хариуцлага ногдуулах нь сонирхол татаж байгаа. Энэ удаагийн улс төрийн үйл явцаас харвал тус намд 2017 оны Ерөнхийлөгчийн сонгуулиар намынхаа нэр дэвшигчийн эсрэг ажилласан тохиолдол нэг биш нилээн хэд байгааг тооцоход АН-ынхан шиг хариуцлага ярьж байгаад хоосон шагнаад явуулчихад ч гайхах хэрэггүй.

Ер нь МАН дүрмээ лоозогнодог уу хэрэглэдэг үү гэдгийг энэ өдөр бас Монгол түмэн мэдэж авна.