УМАРД СОЛОНГОС ДАХИАД ЯПОНЫ НУТАГ ДЭВСГЭРИЙГ ДАВУУЛАН ПУУЖИН ХАРВАЛАА

Баасан гаригийн үүрээр Умард Солонгос пуужингийн ээлжит туршилтаа хийлээ. Нутаг дэвсгэрийг нь давуулан харвасан тул Японы төр засгаас Хоккайдо арлын иргэдээ бат бэх ханатай найдвартай газар нуугдахыг анхааруулжээ. Мөн пуужингийн харвалтын тухай мэдээг авмагцаа хойд бүс нутгийнхаа хурдан галт тэргийн хөдөлгөөнийг Японы тал түр зогсооход хүрчээ.

Гэхдээ пуужин Японы нутаг дэвсгэр болон ард иргэдэд ямар ч хор хохирол учруулалгүй харвасан цэгээсээ 3700 км-ын зайд буюу Японы хил хязгаараас 2000 км-ын зайд унасан байна. Пуужингийн нисэлтийн дээд өндөр 770 км-д хүрсэн гэнэ.

Умард Солонгосын энэ удаагийн пуужингийн туршилтыг НҮБ-аас тус улсын эсрэг авах хориг арга хэмжээг чангатгасны эсрэг үзүүлж буй үйлдэл гэж мэргэжилтнүүд дүгнэж байна.

М.Болджин