ЕРӨНХИЙ САЙДАД 10-ААД ХҮНИЙ НЭР ЯРИГДАХ БОЛЛОО

Засгийн газрыг унагахад хүчин зүтгэсэн 33 гишүүн орондоо ч орох завгүй хуралдаж байна.

Ж.Эрдэнэбатын Засгийн газрын алтан хайрцгийг далдуур нээсэн хүн бол УИХ-ын дэд дарга Ц.Нямдорж гэж улс төрийн хүрээнийхэн жиг жуг хийв. УИХ-ын дэд дарга Ц.Нямдорж Ерөнхий сайдын суудлыг нэг бол надад, нөгөө бол УИХ-ын гишүүн Ч.Хүрэлбаатарт өг, би бусад ямар ч томилгоонд хошуу болоод гар дүрэхгүй гэсэн тохироо хийсэн гэх мэдээлэл бий. Насаараа их хуралд сууж байгаа Ц.Нямдорж гишүүний улс төрийн зам бараг энэ сонгуулийн жилээр дуусч мэдэх. Тэр Ерөнхий сайдын суудалд суугаад тэтгэвэртээ гарах нь түүний сүүлчийн хүсэл ч байж магад.

Харин Монгол Улсын 30 дахь Ерөнхий сайдад УИХ-ын дарга М.Энхболд, УИХ-ын гишүүн Н.Энхболд, УИХ-ын гишүүн Сү.Батболд, УИХ-ын гишүүн Ж.Энхбаяр, УИХ-ын гишүүн С.Бямбацогт, УИХ-ын гишүүн Ж.Мөнхбат, УИХ-ын гишүүн Ч.Хүрэлбаатар, УИХ-ын гишүүн Д.Хаянхярваа, Шадар сайдын үүргийг түр орлон гүйцэтгэгч У.Хүрэлсүх нар ил далдаар зүтгээд эхэллээ.

Засгийн газрыг огцруулахаар сэтгэл санаа нь шулуудсан 31 гишүүн эхэндээ бол Ерөнхий сайдаар У.Хүрэлсүхийгээ томилуулна гэдэг дээр санал нэгдсэн. Харин энэхүү тоглолтонд дээр орж ирсэн Ц.Нямдорж тоглоомын дүрмийг өөрчлөж Увсаас Засгийн газрын тэргүүн тодруулахааар зүтгэж эхэлсэн нь 30 гишүүнд хагаралын эхлэлийг тавьжээ. Яаж ч бодсон ЗГ-ыг унагаад дараагийн бялуу 30 гаруй гишүүнд хувааж хүрэлцэхгүй. Ямартай ч Монгол Улсын Ерөнхий сайдад 10-аад хүний нэр яригдах боллоо. Чухам хэн нь Ерөнхий сайд болохыг цаг хугацаа харуулах биз ээ.