АБЭ: ПУТИН, БАТТУЛГА ХОЁР ЖҮДОГИЙН ХАР БҮСТЭЙ, ТЭДНИЙГ БАРИЛДУУЛЬЯ!

ОХУ-ын Владивостокт болж буй Дорнын Эдийн засгийн чуулганы үеэр Японы Ерөнхий сайд Шинзо Абэ индэр дээрээс жүдо бөхийн тухай ярьж, ОХУ-ын Ерөнхийлөгч Владимир Путин болон Монголын Ерөнхийлөгч Х.Баттулгыг барилдуулья гэсэн санааг хэлжээ.

"ОХУ-ын Ерөнхийлөгч Владимир Путин жүдогийн хар бүстэй. Монголын Ерөнхийлөгч Халтмаагийн Баттулга ч мөн хар бүстэй. Японы Жүдо Бөхийн Холбооны шугамаар хар бүстэй Ерөнхийлөгчдийг уривал ямар вэ? Тэгвэл та бүхэн Японд Ерөнхийлөгчдийн үзүүлэх халз барилдааныг үзэж болно шүү дээ" гэж Шинзо Абэ хэлсэн байна.

Харин өөрийнхөө тухайд "Надад хар бүс байхгүй. Тэгээд ч гэмтэж бэртмээргүй байна. Тийм болохоор хажуугаас нь чимээгүйхэн хараад сууж байя" гэж Шинзо Абэ өгүүлжээ.

ОХУ-ын Ерөнхийлөгч Владимир Путин энэхүү яриаг дэмжиж "Саявтархан дуртай спорт болох Жүдо бөхийн ДАШТ-ийг үзэхдээ Будапештэд бид уулзсан. Бид хоёрын нэгдмэл сонирхол хоёр улсын хоорондын харилцааг улам сайжруулж, хөгжүүлэхэд их дэм өгнө гэж найдья" хэмээн хэлсэн юм.

М.Болджин