​ТРАМП УМАРД СОЛОНГОСЫН ЭСРЭГ ЦӨМИЙН ЗЭВСЭГ ХЭРЭГЛЭХЭД БЭЛЭН ГЭДГЭЭ МЭДЭГДЭВ

Өнгөрсөн ням гаригийн үүрээр Умард Солонгосын тал устөрөгчийн бөмбөг амжилттай туршсанаа албан ёсоор зарласан. Атомын бөмбөгөөс хэдэн зуу, мянга дахин хор хөнөөлтэй энэхүү бөмбөгийг туршсан явдал Солонгосын хойг дахь нөхцөл байдлыг улам хурцатгалаа.

Хэвлэлүүдийн мэдээлж буйгаар Умард Солонгосын устөрөгчийн бөмбөгийн тэсрэлтийн хүч ойролцоогоор 100 килотонн байсан гэнэ. Түүхээс харвал Японы Хирошимад хаясан атомын бөмбөгийн хүч 15 килотонн байсан гэдэг. Тэгэхээр Умард Солонгосын бөмбөг хүчтэй нь тодорхой ойлгогдоно.

Энэхүү явдал АНУ-ын Ерөнхийлөгч Дональд Трампыг Умард Солонгосын эсрэг цөмийн зэвсэг хэрэглэхэд бэлэн байгаагаа мэдэгдэхэд хүргэжээ. Дональд Трамп Японы Ерөнхий сайд Шинзо Абэтэй утсаар ярихдаа "Холбоотнуудынхаа аюулгүй байдлыг хангахын тулд дипломат болон энгийн арга хэрэглэхээс гадна мөн цөмийн зэвсэг хэрэглэхэд бид бэлэн" гэж хэлсэн байна.

Мөн Пентагоны тэргүүн Жеймс Мэттис "Бид тэдэнд маш хүчтэй хариу цохилт өгөхөд бэлэн байгаа" гэж мэдэгджээ. Гэхдээ Солонгосын хойг дахь хурцадмал байдлыг намжаах өөр хэд хэдэн гарц байгааг ч Жеймс Мэттис дурьджээ. АНУ-ын зүгээс цөмийн зэвсэг хэрэглэлээ гэхэд Умар Солонгосыг бүхэлд нь үгүй хийхийг зорихгүй гэдгээ ч Жеймс Мэттис дурьдсан байна.

М.Болджин