МАН-ын бүлэг өчигдөр есөн цагийн турш Төрийн ордны Б танхимд 70 гаруй хувийн ирцтэй хуралдав. Хурал 22:20 минутад өндөрлөсөн. Төрийн ордны коридорыг хааж хамгаалалт гаргаж байгаад тэд нам доторх зөрчлөө жинтэйхэн ярилцжээ.
Хуралд УИХ дахь МАН-ын бүлгийн гишүүдээс гадна, МАН-ын Ерөнхий нарийн бичгийн дарга Д.Амарбаясгалан, Монгол Улсын Шадар сайд У.Хүрэлсүх, Монгол Улсын Ерөнхий сайд Ж.Эрдэнэбат нар оролцлоо. Эрх баригчид энэ хурлаараа Засгийн газраа авч үлдэх үү, эсвэл огцруулах уу гэдэг саналаа нэгтгэх ёстой. Гэвч өчигдөр саналаа нэгтгэж чадсангүй маргасаар шийдэлд хүрэлгүй тарцгаав.
МАН-ын бүлгийн хуралдааны үеэр засгийн газрыг огцруулах 30 гишүүний арын "нууц ноёнтон" болох УИХ-ын дэд дарга Ц.Нямдорж ил гарч иржээ.
Өөрөөр хэлбэл, Монгол Улсын Засгийн Газрыг огцруулах 30 гишүүн дээр Ц.Нямдорж нэмэгдэж 31 болов. Бүлгийн хуралдааны дундуур Ц.Нямдорж, Д.Лүндээжанцан нар байн байн орж гарч ууртай, уцаартай хэвлэлийнхэнд ярилцлага өгөхгүй гэж хэдэрлэж байсан юм. Олон жил парламентад байсан хашир улс төрчдийн хувьд буйр заан байр суурь илэрхийлэхгүй байгаа мэт харагдавч, цаагуураа залуусаа турхирч, "яс булаалдсан ноход" шиг нийгэмд харагдуулах үйлдлийг хийсэн нь нэг л таагүй.
Ямартай ч есөн цагийн турш эрх баригч нам хуралдсан ч нэгдсэн шийдэлд хүрэлгүйгээр хуралдаанаа завсарлуулжээ. Гэхдээ тэд хэзээ нэгдсэн шийдэлд хүрэх нь тодорхойгүй. Эх сурвалжийн мэдээлж буйгаар намын удирдлагууд нь аргаа барахдаа нэгдсэн байр сууринд хүрч байж бүлэг цааш хуралдах шийдвэрийг гаргасан гэх.
Тодруулбал, МАН-ын үе үеийн дарга нар, одоогийн дарга, ерөнхий сайд, шадар сайд, бүлгийн дарга, намын ерөнхий нарын бичгийн дарга нар хоорондоо учир зүйгээ олвол эрх баригчдын хурал үргэлжлэх аж. Эрх баригч намын бүлэг хуралдах үед тэд хэвлэлийнхнээс нэлээн жийрхэж, төрийн ордны хамгаалалтаар сэтгүүлчдийг нэг цэгт хориулж, тодруулга, яриа авах гэсэн сэтгүүлчдээс нэлээн дөлнө билээ.
Дашрамд дуулгахад Засгийн газрыг огцруулах тухай яриа дэгдэх үеэс эхлэн хэвлэлээр дамжуулан бие биерүүгээ элдэв үг чулуудаж байсан У.Хүрэлсүх, Н.Номтойбаяр нарын нөхөрсөг дүр төрх, сэтгүүлчдийн нүдэнд өртсөн юм. Хэвлэлээр хонь чоно болоод байсан Монгол Улсын Шадар сайд У.Хүрэлсүх, ХНХ-ын сайд Н.Номтойбаяр нар УИХ-ын гишүүн Д.Лүндээжанцангийн өрөөнөөс нэг нэгийнхээ дал мөрөн дээр гараа тавиад инээд алдаж гарч яваад сэтгүүлчдэд гардуулав. Хэвлэлээр тэгтлээ их дайтсан сайд нар төрийн ордонд хэлхэлдэж байхад бусад нь хөшигний ард албан тушаалаа хувааж аваад хэвлэлийн тайзан дээр "бид эв зүйгээ оллоо" гэж жүжиг тоглон бантагнуулах биз.
Н.БАТ
Улаанбаатар °C 
Сэтгэгдэл (0)
Сэтгэгдэл бичигдээгүй байна