​АН-ЫН ТОХИРОО ЮУ БАЙХ БЭ

Хууль тогтоох дээд байгууллагад 65 суудал авсан МАН-ын нэр бүхий 30 гишүүн засгийн газраа огцруулах бичгийг УИХ-ын дэд дарга Я.Санжмятавд өргөн барьсан явдлыг олон нийт болон улс төрийн нам, улстөрчид тийм ч таатай хүлээж авахгүй байгаа бололтой. Ямар сайндаа л сөрөг хүчний дарга нь эрх баригч намд "сургаал хайрлаж" суухав.

Сөрөг хүчний дарга С.Эрдэнэ " Засгийн газрыг огцруулна, огцруулахгүй гэдгээс илүү өнөөгийн нийгэм, эдийн засгийн тулгамдаж буй асуудал дээр илүү бодит дүгнэлт, алхам хийх шаардлагатай. МАН-ын засгийн газрын хувь заяаг АН шийдэхгүй, шинэ засагт ч орохгүй" гэж мэдэгдээд байгаа юм.

Хуулиараа бол чуулганы хуралдаанаар гишүүдийн 51-ээс дээш хувь нь дэмжвэл саналыг нь хүлээн авах горимтой байдаг. Тодруулбал УИХ-ын 76 гишүүний 39 нь огцруулах асуудлыг дэмжвэл засаг унана гэсэн үг юм. Ямартай ч Засгийн газраа унагахаар зүтгэж буй МАН-ын 30 гишүүн дээр намаас нь ганц ч гишүүн нэмэгдэхгүй. Харин АН-аас болон МАХН-ын гишүүн О.Баасанхүү нарын хувьд тохироо нь бүрдвэл Засгийн газрыг огцруулах саналыг дэмжих магадлалтай.

Тэгэхээр хамгийн түрүүнд МАН-ын 30 гишүүн бусад намаас 9 хүний дэмжлэг авахын тулд Засгийн газарт хамтрах саналыг хүргэх тохироог хийх боломжтой. Гэвч АН-ын дарга С. Эрдэнэ "шинээр байгуулагдах засгийн газарт манай нам орохгүй" гээд мэдэгдчихлээ. Хэрвээ АН-ынхан Засгийн газарт орохгүй" юм бол МАН-аас өөр юу хүсэх вэ гэдэг нь хачирхалтай.

Төрийн ордонд "хөвөрч" буй яриагаар бол АН-ынхан АТГ, Шүүх, Прокурор гээд хууль хяналтын байгууллагыг өөрсдийн мэдэлд авах хүсэлтэй байгаа гэх. Тэгэхээр МАН-ынхан эдгээр байгууллагуудаа АН-д өгчихвөл Ж.Эрдэнэбатынхаа Засгийн газрыг унагахад толгой өвтгөх асуудалгүй болох юм. Гэхдээ МАН-ынханы хувьд "энхийн цагаан тагтаанууд" тийм ч олон байхгүй болохоор хууль хяналтын байгууллагыг өөрсдийн мэдлээс тавиад туучих нь эрсдэлтэй байх биз. Харин ч "нуухыг нь авах гээд нүдийг нь сохлов" гэдэг эрсдэлд өртөх магадлалтай. Гэвч улс төрийн нөхцөл байдал хэрхэн өрнөж, намын бүлгүүд байр сууриа хэрхэн нэгтгэхээс бүх зүйл шалтгаална. Тиймээс Засгийн газрыг огцруулах асуудал УИХ дээр хэрхэн өрнөхийг ажиглаж суух л үлдэж байх шиг байна. .

Ц.Бат