Үерийн эрсдэлтэй бүсийн иргэдийг сэрэмжтэй байхыг анхааруулж байна

Ойрын өдрүүдэд цаг агаар дулаарч, цас, мөс хайлахтай холбоотойгоор шар усны үерийн эрсдэл нэмэгдэж байна. Иймд Сонгинохайрхан дүүргийн Онцгой байдлын хэлтсээс иргэдэд болзошгүй үер, усны аюулаас урьдчилан сэргийлж, сонор сэрэмжтэй байхыг анхааруулж байна.

Одоогоор дүүргийн хэмжээнд 2, 7, 23, 32, 40, 41 дүгээр хороод шар усны үерийн эрсдэлтэй бүсэд байгаа тул тухайн хороодын айл өрх, аж ахуйн нэгж, байгууллагууд урьдчилан сэргийлэх арга хэмжээг авч ажиллах шаардлагатай байна.

Иргэд та бүхэн:

Өөрийн гэр, хашаа, эд хөрөнгө, мал аж ахуйгаа болзошгүй үерийн аюулаас хамгаалах;

Хашаа, орон байрны ойролцоох цас, мөс, ус зайлуулах суваг, шуудууг цэвэрлэж, ус чөлөөтэй урсах нөхцөлийг бүрдүүлэх;

Гол, горхи, жалга, гуу болон ус тогтдог эрсдэлтэй газарт ойр байрлахгүй байх;

Хүүхдийг хараа хяналтгүйгээр гол, горхи, ус тогтсон хэсэгт тоглуулахгүй байх;

Үерийн усанд автсан зам, гүүр, гармаар зорчихгүй байх;

Цас, мөс эрчимтэй хайлж буй үед автомашин болон бусад эд хөрөнгөө эрсдэлтэй бүсээс хол байршуулахыг зөвлөж байна.

Болзошгүй эрсдэлийг урьдчилан тооцож, өөрийн болон гэр бүлийнхээ аюулгүй байдлыг ханган, цаг агаарын мэдээ, сэрэмжлүүлгийг тогтмол хүлээн авч байхыг Сонгинохайрхан дүүргийн Онцгой байдлын хэлтсээс анхааруулж байна.