Налайх дүүргийн замыг түр хаана

Улаанбаатар-Өндөрхаан чиглэлийн автозамын зарим хэсэгт ээлжит засварын ажил хийхээр болжээ.  Засвар энэ сарын 29-нөөс долдугаар сарын 8-ныг хүртэл үргэлжилнэ. Энэ хугацаанд Зэвсэгт хүчний 353 дугаар ангийн уулзвараас Налайх дүүргийн 4 дүгээр хороо руу салдаг уулзвар хүртэлх автозамыг түр хугацаанд хаах юм. “Авто замын засвар арчлалтын нэгтгэл” ТӨХК-ийн Налайх дүүрэг дэх салбарынхан тус замын ПК32-33.2 дахь хэсэгт буюу Зэвсэгт хүчний 014 дүгээр ангийн урдах автобусны буудлаас “Шүрэн” дэлгүүр хүртэлх 1.2 км автозамд засвар хийнэ.

Зүүн аймгууд болон Тэрэлж чиглэлд зорчих иргэд, тээврийн хэрэгслийн жолооч нарыг дараах чиглэлээр зорчихыг зөвлөж байна. 353 дугаар ангийн уулзвараар Налайх дүүргийн төв рүү нэвтэрч, Буян Налайхын уулзвараар чигээрээ зорчин, Хоргын уулзвараар зүүн эргэн, 4 дүгээр хорооны голын зам буюу Божуугийн замаар Налайх-Тэрэлжийн постоор зорчиж, цааш хөдөлгөөнөө үргэлжлүүлэх боломжтой. Засварын хугацаанд жолооч нар замын тэмдэг, тэмдэглэгээ, зохицуулагчийн зааврыг мөрдөж, анхаарал болгоомжтой зорчихыг холбогдох байгууллагаас анхаарууллаа.