Монголын ууган сүлжээ "Миний дэлгүүр" ХХК ISO 9001 гэрчилгээгээ гардан авч, системт өсөлт рүү шилжлээ

Монголын жижиглэн худалдааны салбарын анхдагч “Миний дэлгүүр” ХХК олон улсын аудитын байгууллагаас "ISO 9001" чанарын менежментийн системийн гэрчилгээгээ энэ долоо хоногт албан ёсоор гардан авлаа. Жижиглэн худалдааны салбарт энэхүү гэрчилгээг эзэмшигч компани Монголд цөөн байдаг бөгөөд "Миний дэлгүүр"-ийн хувьд энэхүү үйл явдал нь зорилгынх нь дуусгавар цэг биш, харин илүү том өсөлтийн эхлэл болж байна.

Түүхэн замнал:
1990-ээд онд Монгол улс зах зээлийн эдийн засагт шилжих үед үүсгэн байгуулагч С.Сэргэлэн жижиглэн худалдааг "сүлжээ" хэлбэрээр хэрхэн эрхлэх гарцыг анхлан хайж эхэлсэн түүхтэй. Өнөөдөр "Миний дэлгүүр" нь Монголын ууган сүлжээ дэлгүүр болохоос гадна өөрсдийн зохион бүтээсэн ERP системийг нэвтрүүлсэн, "hard discounter" буюу үнийн давуу талт загвараар ажилласан, хувийн брэнд бүтээгдэхүүнийг зах зээлд танилцуулсан, категори менежмент болон зорилтот урамшууллыг (promotion) анх системтэй хэрэгжүүлсэн зэрэг олон "анхны" түүхийг бүтээсэн компани юм.
Олон Монгол бизнесүүдийн адил үүсгэн байгуулагчийн зөн совин, шуурхай шийдвэрээр хөгжиж ирсэн тус компани өнөөдөр систем дээр түшиглэсэн менежмент рүү ухамсартай шилжилт хийж байгаагийн албан ёсны баталгаа нь ISO 9001 гэрчилгээ болж байна.

Үйл ажиллагааны цөм: Хэрэглэгчдэдээ өгөх Зургаан амлалт
Компанийн чанарын бодлогын баримт бичигт тусгагдсан хэрэглэгчдэд өгөх "Зургаан амлалт" нь зүгээр нэг уриа үг бус, салбар бүрийн өдөр тутмын үйл ажиллагаандаа мөрдөх хатуу стандарт юм. Энэхүү систем нь хоорондоо салшгүй уялдаатай дараах 6 хэсгээс бүрддэг:
1. Доод үнэ: Энэ нь зүгээр "хямд зарах" тухай ойлголт биш. Үйлдвэрлэгчтэй шууд харьцаж, үйл ажиллагааны зардлаа хэмнэх замаар бий болгосон хэмнэлтийг ашиг бус үнэ дээрээ буцаан тусгадаг зарчим юм.
2. Түргэн, найрсаг үйлчилгээ: Хэрэглэгчийн цаг хугацааг үнэлэх үнэлэмж. Кассын дарааллыг багасгахын тулд ажилтнуудад санаачилга гаргах, шийдвэр гаргах эрх мэдлийг олгодог.
3. Шинэ соргог жимс, ногоо: Монголын цаг уурын нөхцөлд хамгийн өрсөлдөөнтэй энэ ангилалд дэлхийн өнцөг булан бүрээс улирлын чанартай бүтээгдэхүүнийг хамгийн эрт, боломжийн үнээр нийлүүлдэг.
4. Хувийн брэнд: Монголд хувийн брэндийг анх 2020 онд танилцуулж байсан бол өнөөдөр тэдний "365" брэндийн бараа, бүтээгдэхүүн хэрэглэгчдийн судалгаагаар тэргүүн байр эзэлж байна.
5. "Амжиж ав": Улиралд нь тохирсон чанартай ахуйн барааг хямдралтай хугацаанд нь амжиж авах боломжийг худалдан авагчдад олгодог.
6. Найдвартай хүнсний аюулгүй байдал: Дээрх таван амлалтын ёс зүйн суурь. Нийлүүлэгч сонгох, хүйтний гинжин хэлхээ, бараа буцаалт зэрэг нийт 20 гаруй дотоод процессыг хамарсан энэхүү хяналт нь ISO 9001 системээр бүрэн баталгаажиж байна.
Дараагийн алхам юу байх вэ?
Өнөөдрийн байдлаар "Миний дэлгүүр" сүлжээ нь нийслэл болон орон нутагт 80 гаруй салбартайгаар үйл ажиллагаа явуулж байна. Энэ онд гэхэд нэмж 20 шинэ салбар нээхээр төлөвлөснөөс 9 байршлын гэрээ байгуулагдаж, 6 нь хэлэлцээний шатандаа явж байна.
"Дэлхийн стандартад нийцсэн, нийгэмдээ хувь нэмэр оруулсан тэргүүлэх жижиглэн худалдаачин болох" тэдний алсын хараа ISO 9001 гэрчилгээгээр ийнхүү албан ёсоор биеллээ оллоо. Одоо тус компани дараагийн илүү өндөр түвшний алсын харааг боловсруулж байгаа хэдий ч "Түмэн олныхоо өдөр тутмын амьдралыг баяжуулах" эрхэм зорилго нь хэзээ ч өөрчлөгдөхгүй гэдгээ онцолж байна.