"Монгол Улсын төрийн далбаа мандуулах хөтөлбөр"-ийг нээлээ

ЕБС-ийн сурагчид даваа гаригийн өглөө сургуулийнхаа гадаа төрийн далбаагаа мандуулж, баасан гаригт хүндэтгэлтэйгээр буулгадаг энгийн мөртлөө утга төгөлдөр, ач холбогдол өндөр энэ хөтөлбөрийг өнгөрсөн жил 52 сургууль дээр хэрэгжүүлсэн. Сурагчид төрийнхөө далбааг мандуулахын төлөө эерэгээр өрсөлдөж, хичээлээ таслахаа байж, хоорондоо англиар ярихаа багасгаж, эх оронч үзэл санаа батжиж, хариуцлагатай иргэн болж төлөвшиж олон эерэг үр дүн гарсан байна. Иймээс энэ хөтөлбөр үр дүнтэй гэж үзсэн тул энэ жил нийслэлийн бүх сургуулиуд хэрэгжүүлж байна.

Бид хүүхдээ оюуны боловсролтой болгох чухал ч зүрх сэтгэлийн боловсрол олгох түүнээс илүү чухал байна. Монгол хүний мөн чанар ээж аав, эх орноо гэх халуун дулаан сэтгэлтэй, тэнгэр шиг уужуу, тал нутаг шигээ амгалан байдаг. Эх орныхоо далбааг хүндэтгэн мандуулах агшин бүрт эх орныхоо өмнө хариуцлагаа мэдэрч байдаг. Иймээс энэхүү хөтөлбөр нь зөвхөн нэг ёслол төдий биш, харин хүүхэд бүрийн сэтгэлд эх орноо хайрлах, хүндэтгэх ухамсрыг төлөвшүүлэх чухал алхам шүү гэдгийг хүүхдүүддээ захимаар байна.