Говьсүмбэрт хоёр автомашин мөргөлдөж, нэг хүн хавчуулагдсаныг аврагчид гаргажээ

Говьсүмбэр аймгийн Сүмбэр суманд хоёр суудлын автомашин мөргөлдсөн осол гарч, нэг иргэн автомашины төмөр хийцэд хавчуулагдсан байна.

Тодруулбал, Сүмбэр сумын “Найрамдал” 3 дугаар багийн “Сүмбэр гарден” цэцэрлэгт хүрээлэнгийн урд төв зам дагуу “Vellfire” загварын гэр бүлийн суудлын автомашин, “Prius” загварын суудлын автомашинтай мөргөлджээ. Осол болсон тухай дуудлага Онцгой байдлын байгууллагад 20:20 цагт ирсэн байна.

Дуудлагын дагуу Говьсүмбэр аймгийн Онцгой байдлын газрын 37 дугаар ангийн алба хаагчид очиход автомашины төмөр хийцэд иргэн А /31 настай, эмэгтэй/-ийн зүүн хөл хавчуулагдсан байжээ. Аврагчид шуурхай ажиллаж, иргэнийг эсэн мэнд гарган авч аймгийн Яаралтай тусламжийн төвийн эмч нарт хүлээлгэн өгсөн байна. Хэргийг холбогдох байгууллагууд шалгаж байна.