С.Шаарийбуу: Монголын төрд анх удаа хандахад асуудлыг маань их шуурхай шийдэж өглөө

Ш.Алтантуяа агсны аав С.Шаарийбууг өнөөдөр Ерөнхий сайд Г.Занданшатар хүлээн авч уулзсан юм.  Монгол Улсын Засгийн газраас түүнийг дэмжиж, ажлын хэсэг байгуулахаар боллоо. 

С.Шаарийбуу “Сүүлийн үед цахим орчин, хэвлэл мэдээллээр  Ерөнхий сайдад өргөдөл гаргасан, уулзах гэж байгаа юм байна гэдэг асуудал их хүчтэй яригдлаа.  Монголын төрд анх удаа хандлаа. Сайхан хүлээж авдаг юм байна. Гол нь асуудлыг их шуурхай шийдэж өглөө. Би өргөдлөө бичээд авч орсон юм.  Хорин жил Малайзын засгийн газар миний эсрэг өргөдөл гаргаж явсан. Нэг улсын иргэнтэй бүхэл бүтэн улс, хууль шүүхийн байгууллага, төр засаг  давж заалдаж байсан. Миний бие өмгөөлөгч Б.Баяр, өөр нэг эмэгтэй бас бий. Бид гурав л хорин жил зүтгэсэн. Энэ удаад би аргагүйн эрхэнд тус улсын Дээд шүүхэд давж заалдсан. Миний ганц боломж энэ л байсан. Иргэн хүн холбооны шүүхэд давж заалддаг. Монгол Улсын Засгийн газар иргэнийхээ төлөө санаа тавих, асуудалд хандах боломж нээгдэж байгаа юм. Өмнө нь болдоггүй байсан. Улсын асуудал, хуулийн асуудалд хөдлөнгөөс орж болохгүй гэсэн дүрэмтэй. Мэдээж уулзалтын үр дүнд ямар шийд гаргав гэхээр шуурхай ажлын хэсэг байгуулахаар болсон. Ажлын хэсэг Австрали, Малайзтай хэрхэн хамтарч ажиллах, асуудлыг яаж шийдэх зэрэг боломжтой болж байна. Тус ажлын хэсэгт миний бие болон хуульчид, хүний эрхийн байгууллага болон Засгийн газрын тодорхой төлөөлөгчид байна. Ажлын хэсгийн ахлахаар Ш.Раднаасэдийг томилсон. Ингэхээр түвшин, агуулга, ач холбогдол нь өөр нөхцөлд асуудал шийдвэрлэгдэх боломжтой нөхцөл бүрдүүлж өгч байгаа явдал туйлын чухал байлаа. Гол нь би Малайзын Дээд шүүхэд давж заалдах өргөдөл л гаргасан. Тэд зөвшөөрвөл давж заалдах боломжтой болно. Тиймээс би зөвшөөрүүлэхийн тулд Засгийн газартаа хандсан юм. Өмнө Засгийн газартаа хандаж болохгүй байсан. Нээлттэй биш учраас тэр. Нэгдүгээрт эрх зүйн гэрээ байхгүй. Хоёрдугаарт Малайзын шүүх надтай давж заалдаад байсан учраас манай Засгийн газар тус улсын ажилд хөндлөгөөс оролцох боломжгүй. Харин одоо би давж заалдаж байгаа учраас төртэйгөө хамтрах боломж гарч байгаа юм. Ихэнх хүмүүс намайг мөнгөний төлөө яваад байна гэдэг. Мөнгөндөө гол бус үнэний төлөө явж байгаа. “Уучлаарай” гэдэг үгийг л хэлүүлэх гээд байгаа юм. Гэвч зарим хэрэг хийсэн хүмүүс Австралид, зарим нь нутагтаа буюу Малайзад байж байдаг. Ийм л маш сонирхолтой нөхцөл байдал үргэлжилсээр хорин жил боллоо доо” гэлээ.