Нурууны мэдрэлийн өвдөлтийг намдаах эмчилгээний аргыг нэвтрүүлжээ

Төрийн тусгай албан хаагчдын нэгдсэн эмнэлгийн Өвдөлт намдаах кабинетынхан нурууны мэдрэлийн ёзоор дарагдаж, үрэвссэнээс үүдэлтэй өвдөлтийг намдаах эмчилгээний аргыг нэвтрүүлжээ.

Мэдрэлийн ёзоорын өвдөлт намдаах тарилга нь рентген хяналт дор хагалгааны ариун орчинд хийдэг нарийн ажилбар бөгөөд тус эмнэлгийн Мэдрэлийн мэс заслын зөвлөх эмч Б.Батсайханы удирдлага дор тусламж үйлчилгээг үзүүлж байна. Тус эмнэлэг нь MRI оношилгооны аппаратыг ашиглалтад оруулснаар мэдрэлийн мэс заслын тусламж үйлчилгээг өргөжүүлэх, нотолгоонд суурилсан анагаах ухааныг хөгжүүлэхэд тус дөхөм болжээ. Энэхүү нь нурууны нугалам хоорондын нүхээр дамжуулан үрэвслийн эсрэг кортикостероид эмийг шууд мэдрэлийн ёзоорт тарьж, хавдар ба үрэвслийг бууруулж өвдөлтийг намдаадаг байна.   Үүнийг нурууны дискний ивэрхий, суудлын мэдрэлийн өвдөлт, нурууны сувгийн нарийсал, мэдрэлийн ёзоор дарагдахад хэрэглэдэг аж. Ингэснээр өвдөлт намдаж, хөдөлгөөн сайжрахаас гадна мэс заслаас зайлсхийх боломжийг нэмдэг байна.