Сураггүй болсон иргэнийг эсэн мэнд олж, ар гэрт нь хүлээлгэн өгчээ

Сүхбаатар аймгийн Эрдэнэцагаан сумын Жаргалант багийн “Өвөр хөндий” гэдэг газар (аймгийн төвөөс зүүн урд зүгт 190 км-т, сумын төвөөс хойд зүгт 30 км-т) оршин суугч иргэн А /сэтгэцийн эмгэгтэй/ нь 2026 оны 02 дугаар сарын 22-ны өдрийн 18:00 цагийн орчим хажуу айлаасаа гараад сураггүй болсон тухай дуудлагыг мөн өдрийн 23:40 цагт холбогдох байгууллага хүлээн авчээ.

Дуудлагын дагуу тус аймгийн Онцгой байдлын газрын Эрдэнэцагаан сум дахь 47 дугаар ангийн алба хаагчид болон сумын Мэргэжлийн ангийн бүрэлдэхүүн 02 дугаар сарын 23-ны өдрийн 01:55 цагаас эрэн хайх, аврах ажиллагааг шуурхай зохион байгуулсан байна.

Улмаар мөн өдрийн 08:50 цагт сураггүй болсон газраас баруун урд зүгт 8 км-т орших “Мухар-Эрэг” гэдэг газраас иргэнийг хээрээс эсэн мэнд олж, ар гэрийнхэнд нь хүлээлгэн өгчээ.

Аврах ажиллагаа амжилттай зохион байгуулагдсан бөгөөд иргэний биеийн байдал хэвийн байна.