Нийслэлд 78.5 км урт дугуйн зам барина

Улаанбаатар хотын захиргаа энэ онд зургаан дүүргийг хамарсан нийт 78.5 км урт дугуйн зам барихаар нарийвчилсан зураг төслийг боловсруулж байгаа талаар албаныхан мэдээллээ.

Төлөвлөсөн замын хэмжээ дүүрэг тус бүрээр:

• Сүхбаатар дүүрэг – 15.17 км
• Чингэлтэй дүүрэг – 3.6 км
• Баянзүрх дүүрэг – 28.23 км
• Баянгол дүүрэг – 18.74 км
• Хан-Уул дүүрэг – 9.18 км
• Сонгинохайрхан дүүрэг – 3.6 км дугуйн зам тус тус барих болно.

Одоогоор Улаанбаатар хотод 101.7 км урт дугуйн зам байгаа юм. Нийслэлийн төлөвлөгөөгөөр, 2026-2028 онд зургаан дүүрэгт 253 км дугуйн зам шинээр баригдах бөгөөд 2040 он гэхэд нийслэлийн нийт дугуйн замын уртыг 1,677 км-д хүргэх зорилттой байна. Дугуйн замын барилга нь “20 минутын хот”-ыг баримтлан, явган хүний зам болон авто замтай уялдуулан, иргэдийн аюулгүй байдлыг бүрэн хангахаар төлөвлөгдсөн байна.

Мэргэжилтнүүдийн үзэж буйгаар энэхүү хөтөлбөр хэрэгжсэнээр автозамын хөдөлгөөнөөс үүдэлтэй агаарын бохирдол, дуу чимээ буурч, иргэдийн идэвхийг нэмэгдүүлэх, эрүүл амьдралын хэв маягийг бүрдүүлэх нөхцөл бий болно. Нийслэлийн удирдлагуудын хэлснээр энэхүү дэд бүтцийн шинэчлэл нь утаагүй, аюулгүй, хөдөлгөөнд ээлтэй хот байгуулах зорилтын чухал хэсэг бөгөөд 2040 он гэхэд унадаг дугуйн соёлыг хотын амьдралын салшгүй хэсэг болгоно гэж онцолж байна.