Улаанбурханы 15 шинэ тохиолдол бүртгэгджээ

Мэдээ: 2026 оны хоёрдугаар сарын 12-ны байдлаар улаанбурхан өвчний нөхцөл байдлын ээлжит мэдээгээр 15 шинэ батлагдсан тохиолдол бүртгэгдлээ. Шинээр илэрсэн тохиолдлуудын 12 нь нийслэлд, 3 нь орон нутагт бүртгэгдсэн бөгөөд нас баралт бүртгэгдээгүй байна.

Улсын хэмжээнд улаанбурхан өвчний батлагдсан нийт тохиолдлын тоо 14,177-д хүрчээ. Үүнээс 11,558 нь Улаанбаатар хотод, 2,614 нь орон нутагт бүртгэгдсэн бол нийт нас баралт 13 байна.

Одоогоор 85 хүн эмчлүүлж байгаагаас 65 нь эмнэлэгт хэвтэн эмчлүүлж, 20 нь гэрээр эмчлүүлж байгаа юм. Нийслэлд эмчлүүлж буй 46 хүний 38 нь дунд, 8 нь хүнд хэлбэртэй байгаа бол нэн хүнд өвчтөн бүртгэгдээгүй байна. Харин орон нутагт эмчлүүлж буй 19 хүний бүгд дунд зэргийн оноштой байна.

Өвчлөлийг насны бүлгээр авч үзвэл 10–14 насныхан хамгийн өндөр өвчлөлтэй хэвээр байгаа нь анхаарал татаж байна. Мөн 0–4 болон 15–19 насны бүлгүүдэд өвчлөл өндөр байгаа нь хүүхэд, өсвөр насныхны дархлаажуулалт, тандалтад онцгой анхаарах шаардлагатайг харуулж байна.