“Дарханы төмөрлөгийн үйлдвэр” ХХК нь ирээдүйн инженерүүдийг бэлтгэх, салбарын хүний нөөцийг чадавхжуулахад хувь нэмрээ оруулах зорилтын хүрээнд их, дээд сургуулиудтай хамтын ажиллагаагаа өргөжүүлэн ажиллаж байна

“Дарханы төмөрлөгийн үйлдвэр” ХХК нь 2025 оны 10 дугаар сарын 29-ний өдөр Монгол–Германы хамтарсан Ашигт малтмал, Технологийн их сургуультай “Харилцан ойлголцлын санамж бичиг” байгуулсан. Уг санамж бичгийн хүрээнд сургалт, судалгааны ажлыг хамтран зохион байгуулах, хамтарсан төсөл хэрэгжүүлэх, лабораторийн судалгааны үр дүнг үйлдвэрлэлд нэвтрүүлэх, үйлдвэрлэлийн дадлага болон туршлага солилцох зэрэг чиглэлээр хамтран ажиллаж байна.

2025 оны 12 дугаар сарын 11-ний өдөр тус сургуулийн “Эрдэс баялаг боловсруулалтын инженерчлэл” мэргэжлийн хөтөлбөрийн 10 оюутан, профессор багшийн хамт “Дарханы төмөрлөгийн үйлдвэр” ХХК-ийн үйлдвэрлэлийн үйл ажиллагаатай танилцлаа.
Оюутнуудад төслийн ерөнхий мэдээлэл, техник технологийн шийдэл, металлургийн инженер мэргэжлийн онцлог, шаардлагын талаар танилцуулж, ирээдүйн инженерүүдийн мэдлэг, ур чадварыг нэмэгдүүлэхэд чиглэсэн сургалт-танилцуулгын арга хэмжээг амжилттай зохион байгуулсан юм.