​Х.Чойбалсангийн мэндэлсний 131 жилий​н ой тохиож байна

Ардын хувьсгалын "анхны долоо"-гийн нэг, Монголын төр, цэргийн нэрт зүтгэлтэн, БНМАУ-ын хошой баатар, Маршал Хорлоогийн Чойбалсангийн мэндэлсний 131 жилийн ой өнөөдөр /2026.02.08/ тохиож байна. Энэ өдөр Монгол Ардын намын дарга, УИХ-ын дарга Н.Учрал МУИС-ийн төв байрны өмнө байрлах Маршалын хөшөөнд цэцэг өргөн хүндэтгэл илэрхийллээ.

Энэхүү арга хэмжээнд Монгол Ардын намын Нарийн бичгийн дарга Б.Пүрэвдагва, Дорнод аймгийн намын хорооны дарга, УИХ-ын гишүүн М.Бадамсүрэн, намын дэргэдэх байгууллагуудын удирдлагууд, газар, хэлтсийн дарга нар, ажилтнууд, ахмадууд, залуучууд, иргэдийн төлөөлөл олноор оролцон төр улсынхаа тусгаар тогтнолын төлөө зүтгэж явсан Маршал Х.Чойбалсангийн түүхэн гавьяа үйлсийг хүндэтгэн хөшөөнд нь мэхийн ёслов.

 Монгол Улсын тусгаар тогтнол, эрх чөлөөний төлөө тууштай тэмцэгч, их удирдагч, шалгарсан хошой баатар, Маршал Х.Чойбалсангийн гэр бүлийнхний төлөөлөлд Монгол Ардын намын дарга, УИХ-ын дарга Н.Учрал хүндэтгэн мэндчиллээ. Маршал Х.Чойбалсангийн зээ охин Ч.Хулан, түүний эгч Ч.Халиуны охин Д.Бишрэл нар цэцэг өргөх ёслолд оролцсон юм.

“Эрхэмлэж яваарай хэмээн машид итгэн

Эрх чөлөө, тусгаар тогтнолыг та нарт үлдээв“ хэмээн Маршал Хорлоогийн Чойбалсангийн хэлсэн үг бий. Монголын түүхэнд Маршал Х.Чойбалсангийн үлдээсэн эрх чөлөө, тусгаар тогтнолын төлөө зориулсан түүхэн гавьяаг дурсаж, залуу хойч үедээ мэдүүлэх, таниулах зорилгоор Монгол Ардын намын удирдлагууд мэндэлсэн ойг нь тэмдэглэн, жил бүрийн энэ өдрийг хүндэтгэн дурсдаг билээ.