Мод, модон материалын тээвэрлэлт, гарал үүслийн мэдээллийг цахимаар олгоно

Төрөөс иргэн, аж ахуй нэгж байгууллагад олгож буй үйлчилгээг цахимаар түргэн шуурхай хүргэх, цаг хугацаа хэмнэх, ойн баялгийг ашиглах, тээвэрлэх, гарал үүслийн гэрчилгээ олгох, хянах үйл ажиллагаанд erp.forest.gov.mn программыг нэвтрүүллээ. Мод, модон материалын тээвэрлэлт, гарал үүслийн мэдээллийг цахимаар олгох, хянах, баталгаажуулах боломж бүрдэж байгааг БОУАӨЯ мэдээллээ.  

Мод, модон материалын гарал үүслийн гэрчилгээг цаасан болон цахим хэлбэрийг хослуулан ашиглахаар зохицуулж, энэ оны зургаадугаар сараас цагдаагийн байгууллагын шалган нэвтрүүлэх цэгүүдэд уг гэрчилгээг зөвхөн цахимаар шалгаж, баталгаажуулахаар төлөвлөжээ. Ингэснээр тээвэрлэж буй мод, модон материалын хууль ёсны эсэхийг газар дээр нь шуурхай хянах, хууль бус мод бэлтгэж тээвэрлэхийг таслан зогсоох, хяналт шалгалтын үр нөлөөг нэмэх нөхцөл бүрдэж байна.