Хулгайд алдагдсан автобусыг замын хөдөлгөөний ухаалаг камерын системээр олжээ

Өнөөдөр буюу нэгдүгээр сарын 30-нд 06:45 цагт нийтийн тээврийн хэрэгслийн жолооч ариун цэврийн өрөө орох үед автобус нь алдагдсан байна. Тодруулбал,  "Сайхан ирээдүй" ХХК-ийн "Ч:27 Өвөрсогоот-Вокзал" чиглэлд үйлчлэх гэж байсан 18-037 гарааш дугаартай нийтийн тээвэр байжээ. Тухайн автобус 07:01 цагт Вокзалаас Өвөр Согоот чиглэлд явах гэж байсан аж. Тээврийн хэрэгслийг авч явсан этгээд камерыг нь унтраасан учир харах боломжгүй болсон тул холбогдох албаныхан Замын хөдөлгөөний Удирдлагын төв, Авто тээврийн хяналтын төвд хандсан байна. Ингээд Замын хөдөлгөөний удирдлагын төвөөс ухаалаг камерын системээр тухайн тээврийн хэрэгслийг Моносын уулзвар орчимд зогсож байгааг илрүүлж, хоёр цаг дотор олжээ.

2024 онд Улаанбаатар хотын 176 уулзвар гарц, замд 2026 гаруй ухаалаг камерыг шинээр суурилуулсан. Ухаалаг камерын системийг найман чиглэлээр ашиглаж байгаа аж.