Г.Болорцэцэг: Эгчийг нөхөр нь цонхоор авч шидэн амь насыг нь хохироосон байхад прокурор хэргийг шүүхэд шилжүүлээгүй

Иргэн Г.Болорцэцэг: Миний эгчийг нөхөр нь цонхоор авч шидэн амь насыг нь хохироосон гэдгийг хүүхдүүд нь нүдээр харж гэрчилсээр байхад прокурор хэргийг шүүхэд шилжүүлэлгүй хаасанд манай гэр бүл маш их гомдолтой байгаа. Мөнгөтэй, танил талтай хүнд хууль үйлчлэхгүй байна.  Хоёр, дөрөв, зургаан насны гурван жаахан хүүхэдтэй 34 настай, АШУИС-д багшилдаг бүсгүй 2022 оны гуравдугаар сард нас барсан. Энэ хэрэг 3 жил 6 сар шалгагдаад, прокурорын шатанд 4 удаа хаагджээ. Одоо үндсэндээ хаагдсан. Хуулийн байгууллагаар 4 жил шахуу улаа эргэтэл явсан ар гэрийнхэн аргаа бараад хэвлэлд хандлаа. Тэдний хоёр болон зургаан настай охид "Аав ээжийг тагтруу чирч гаргаад, цонхоор түлхээд унагачихсан.  Би харсан"  гэж хэлдэг байна. Мөн хоёр настай охин нь тоглодог хүүхэлдэйгээ барьж байгаад аав ээжийг бай бай гээд ингээд чирээд ингээд түлхсэн гэж өөрөө хийж үзүүлж байх юм. Талийгаач бүсгүйн үхэлд түүний нөхрийг саатуулдаг. Гэтэл нөхөр нь цагдаа байсан учир хүмүүстэй ярьж, яриулсан хүмүүс нь байцаагч, прокурор томилж ажиллуулаад хэргийг хаалгасан гэж ар гэрийнхэн ярьсан юм.