“Автомат хаалт онгойлгодог чип”-ийг нийслэлээс дэмжиж 9 дүүрэгт суурилуулна

Цаг минуттай уралдаж ажилладаг цагдаа, эмнэлэг, онцгойгийнхон хотхон, хороолол руу орж чадахгүй цаг алдах, хол машинаа тавиад тоног төхөөрөмжөө аваад алхах зэрэг хүндрэл бэрхшээлүүд гардаг.

Бүх төрлийн хаалт онгойдог чипийг ДХИС-ийн Цахим зайн сургалт хариуцсан ахлах мэргэжилтэн Э.Баттөрийн санаачилгаар ШУТИС-ийн Мэдээлэл холбооны технологийн сургуулийн багш, дэд профессор Ц.Тэнгис, Б.Дорж, Н.Ганхуяг нар зохион бүтээгээд байна.

Эрдэмтэн багш нарын зохион бүтээсэн уг чипийг Цагдаагийн ерөнхий газрын Нийтийн хэв журам хамгаалах олон нийтийн аюулгүй байдлыг хангах албa дэмжин БЗД-т гэмт хэрэг, зөрчлийн дуудлага мэдээлэл хамгийн их бүртгэгддэг 100 байршилд суулгаж туршсан. Энэ хугацаанд цагдаа дуудлага авсан даруйд цаг алдалгүй хотхон, хороололд нэвтэрч, гэмт хэрэг, зөрчилд түргэн шуурхай арга хэмжээ авч, таслан сэргийлсэн гээд олон эерэг үр дүн гараад байна.

Иймээс цаашид монгол эрдэмтэн багш нарынхаа бүтээсэн чипийг 9 дүүргийн хотхон, хорооллуудад суурилуулахаар ярилцлаа. Нийслэлийн иргэдийн эрүүл, аюулгүй байдлын төлөө санаачилга гаргасан эрдэмтэн багш нарт талархал илэрхийлье.