Хүүхэд, гэр бүлийн салбарын нийгмийн ажилтан бол хүний эрх хамгаалагч, манлайлагч

Хүүхэд хамгааллын тухай хуулийн шинэчилсэн найруулгын хүрээнд улсын хэмжээнд сум, хороо бүрд хүүхэд, гэр бүлийн асуудал хариуцсан 833 нийгмийн ажилтан 2025 оны хоёрдугаар сараас ажиллаж эхэлсэн.

Тэднийг нийгмийн ажлын мэргэжлийн үйлчилгээ үзүүлэхэд шаардлагатай мэдлэг, ур чадвар, хүүхэд хамгааллын үйлчилгээ үзүүлэх арга зүйгээр хангах сургалт зохион байгуулж, 21 аймаг, 9 дүүргийн төлөөлөл 150 нийгмийн ажилтныг хамруулж байна.

Хүүхэд, гэр бүлийн нийгмийн ажилтнууд бол хүний эрхийг хамгаалагч, манлайлагчид юм. Мөн хүн бүрийн язгуур эрх, нэр төрийг хамгаалах, нийгмийн шударга ёсыг дэмжихэд чиглэсэн бодит ажлын эхний шугамд зогсдог мэргэжлийн төлөөлөл.

Аймаг, дүүргийн Засаг дарга, орон нутгийн удирдлагууд хуулиараа Хүүхдийн төлөө үндэсний зөвлөлийн гишүүн байдаг. Хүүхдийн язгуур эрх ашгийн төлөө нийгмийн ажилтнууд удирдлагуудаа хүүхдэд ээлтэй шийдвэр гаргаж, хүүхэд хамгааллын бодлого хэрэгжүүлэхийг шахах, шаардах эрхтэй.

Одоо боловсруулагдаж буй Нийгмийн ажлын тухай хуулийн төсөл батлагдсанаар эдгээр албан хаагчдын ажиллах эрх зүйн орчин илүү баталгаатай болж, салбар хоорондын уялдаатай нийгмийн ажлын үйлчилгээг чанартай, хүртээмжтэй, шуурхай, тасралтгүй хүргэх тогтолцоо бүрдэнэ.

Тус хуулийн төслийг боловсруулахад албан хаагчдынхаа санал, дуу хоолойг хүргэж ажиллана. Та бүхнийгээ урам зоригтой, тууштай ажиллана гэдэгт итгэлтэй байна.