БАЙГАЛЬ ОРЧНЫ ХЯНАЛТЫН УЛСЫН БАЙЦААГЧДЫГ ЧАДАВХЖУУЛАХ, ЦАХИМ СУРГАЛТ БОЛЛОО

Байгаль орчин, уур амьсгалын өөрчлөлтийн Сайдын тушаалаар шинээр эрх олгогдсон Байгаль орчны хяналтын улсын /ахлах/ байцаагчдад Төрийн хяналт шалгалтын тухай хууль, Хяналт шалгалтын нийтлэг журам болон Зөрчил шалган шийдвэрлэх үйл ажиллагаа, Шилэн хяналтын цахим систем ашиглалтын талаарх мэдлэг олгох, мэргэжил арга зүйгээр хангах ур чадварыг нэмэгдүүлэх зорилгоор Байгаль орчин, уур амьсгалын өөрчлөлтийн яамны Салбарын хяналтын газраас 2025 оны 09 дүгээр сарын 02-ны өдөр цахим сургалтыг зохион байгууллаа.

Сургалтад БОУАӨЯ-ны Салбарын хяналтын газар, Цаг уур орчны шинжилгээний газар, аймаг, нийслэлийн газрын байгаль орчны газар, Богдхан уулын дархан цаазат газрын хамгаалалтын захиргаа, Монгол Алтай нурууны улсын тусгай хамгаалалттай газруудын хамгаалалтын захиргаа, Тэнгис Шишгэдийн байгалийн цогцолборт газрын хамгаалалтын захиргаа, Отгонтэнгэрийн улсын тусгай хамгаалалттай газрын хамгаалалтын захиргаа, Ноён уулын дархан цаазат газрын хамгаалалтын захиргаа, Хөх Сэрхийн нурууны улсын тусгай хамгаалалттай газрын хамгаалалтын захиргаа, Тарвагатайн нурууны байгалийн цогцолборт газрын хамгаалалтын захиргаа, Мөнххайрханы байгалийн цогцолборт газрын хамгаалалтын захиргаа, Туул голын сав газрын захиргааны хяналтын улсын байцаагчийн эрх авсан мэргэжилтэн, байгаль хамгаалагчид нийт 79 албан хаагчид оролцож байгаа юм.

Энэхүү сургалт нь шинээр эрх олгогдсон Байгаль орчны хяналтын улсын /ахлах/ байцаагчдад цахим хэлбэрээр тогтмол зохион байгуулагдан, байцаагчдад мэргэжил арга зүйн зөвлөгөө өгч, зөвлөн туслах үйлчилгээ үзүүлж байгаа болно.