ГАДААД_ТОМИЛОЛТ ЯПОН УЛСЫН БАЙГАЛЬ ОРЧНЫ ЯАМНЫ УДИРДЛАГУУДТАЙ УУЛЗАЛТ ХИЙЛЭЭ

Байгаль орчин, уур амьсгалын өөрчлөлтийн сайд Б.Батбаатар Фижи Улсын Нади хотноо болж буй Ази, номхон далайн байгаль орчны сайд нарын 6 дугаар форумд оролцох үеэрээ Япон Улсын Байгаль орчны яамны удирдлагуудтай (2025.08.29) уулзлаа.

Олон жилийн амжилттай байгаль орчны бүхий л чиглэлийн хамтын ажиллагааг хөгжүүлж буй хоёр улсын хувьд ирэх жил Улаанбаатар хотноо зохион байгуулагдах Цөлжилттэй тэмцэх тухай НҮБ-ын конвенцын талуудын 17 дугаар бага хурлыг үр дүнтэй, бүтээлч, агуулга өндөртэй зохион байгуулах нь чухлыг ярилцаад хамтарсан замын зураглал байгуулан ажиллахаар тогтлоо. Түүнчлэн Монгол Улсаас дэвшүүлэх санаачилгуудын төслийг нарийвчлах, улмаар японы талаас тус хурлын бэлтгэлийг хангахад дэмжлэг үзүүлэх чиглэлүүдийг нэн ойрын хугацаанд албан ёсоор мэдэгдэхээ батлав.

Монгол, Япон улсууд олон талт байгаль орчны механизмууд, талбаруудад хамтран ажиллаж ирсэн нь хамтын хүчээр тулгарч буй хүндрэл, тулгамдаж буй асуудлуудыг шийдвэрлэхэд хувь нэмэр оруулдаг гэдэгт итгэдэг тул Нэгдсэн Үндэстний Байгуулалгын Байгаль орчны 7 дугаар ассамблейгаар Япон Улсаас дэвшүүлж буй байгаль орчны олон талт гэрээ, хэлэлцээнүүдийн хэрэгжилтийн хангахад уялдаатай төлөвлөх, хамтын ажиллагааг дэмжих агуулгатай тогтоолын төслийг зарчмын хувьд дэмжих боломжтойг Байгаль орчин, уур амьсгалын өөрчлөлтийн сайд Б.Батбаатар илэрхийлэв.